Avropa İttifaqı Rusiyanın zorla Ukrayna ərazilərinə inteqrasiya etmək cəhdlərini pisləyir

Bakı/03.06.22/Turan: "Avropa İttifaqı Rusiya qoşunlarının müvəqqəti hərbi işğalı altında olan  Xerson və Zaporojye vilayətlərinin ukraynalı vətəndaşlarına Rusiya vətəndaşlığının  və Rusiya pasportlarının verilməsi prosedurunu sadələşdirən 25 və 30 may tarixli fərmanlarını kəskin şəkildə pisləyir”, - Avropa İttifaqının adından xarici siyasət üzrə ali nümayəndənin bəyanatında deyilir.

“Avropa İttifaqı Rusiyanın demokratik yolla seçilmiş və legitim Ukrayna administrasiyasını əvəz etmək və rus rublunu valyuta kimi tətbiq etmək cəhdlərini, habelə Xerson və Zaporojye vilayətlərindəki məktəblərdə Rusiyanın təhsil proqramlarını tətbiq etmək və  tədris dilini dəyişdirmək cəhdlərini qətiyyətlə pisləyir”, - bəyanatda qeyd olunur.

“Ukrayna ərazilərinin bir hissəsinin statusunu dəyişdirmək cəhdləri beynəlxalq hüququn, BMT Nizamnaməsinin və Ukrayna Konstitusiyasının açıq şəkildə pozulmasıdır, onlar Ukraynanın suverenliyini və ərazi bütövlüyünü daha da pozur və Avropa İttifaqı tərəfindən tanınmayacaq. Rusiya, onun siyasi rəhbərliyi və beynəlxalq hüququn pozulmasında iştirak edən bütün şəxslər bu qanunsuz hərəkətlərə görə məsuliyyət daşıyacaqlar”, - bəyanatda vurğulanır. 02B