Avropa Məhkəməsi Azərbaycandan göndərilmiş ərizələrlə bağlı 10 qərardadını elan edib

Bakı/30.11.23/Turan: Avropa Məhkəməsi noyabrın 30-da Azərbaycandan göndərilmiş ərizələrlə bağlı 10 yekun qərardadını elan edib. Bu barədə hüquqşünas Xalid Ağalıyev məlumat verib.

Məlumata görə, ərizələrin çoxu kütləvi aksiyalarda saxlanılma, inzibati həbslərlə bağlıdır.

Azərbaycan Xalq Cəbhəsi Partiyasının təsis sənədlərində edilmiş dəyişikliklərin Ədliyyə Nazirliyi tərəfindən qeydiyyata alınmasından imtina olunması ilə bağlı şikayəti isə ümumiyyətlə baxılacaq işlərin siyahısından çıxarılıb. Məhkəmə qərardadında yazıb ki, ərizəçi yazışmalara cavab verməyib.

"Şəmistan Həziyev Azərbaycana qarşı" işində fəal aksiyada saxlanılması və inzibati qaydada həbs olunmasından şikayətçi idi. Hökumət həmin bəyannamədə iddia olunan pozuntuları etiraf edib. Qərardada görə, hökumət ərizəçiyə mənəvi zərər əvəzi 2600, hüquqi xərclər əvəzi 250 avro ödəyəcək.

Keçmiş səhiyyə naziri Əli İnsanov həbsdə ikən 24 avqust 2016-cı il tarixdə ərizəçi qanunsuz olaraq narkotik vasitələrin, o cümlədən psixotrop maddələr olan dərmanların əldə edilməsi və saxlanmasında və cəzaçəkmə müəssisəsinin əməkdaşına zorakılıqla müqavimət göstərməkdə ittiham olunub. Qaradağ Rayon Məhkəməsi 24 avqust 2016-cı il tarixli qərarı ilə ərizəçinin 20 oktyabr 2016-cı il tarixinədək cəzaçəkmə müəssisəsindən istintaq təcridxanasına köçürülməsinə qərar verib. 11 oktyabr 2016-cı ildə Qaradağ Rayon Məhkəməsi ərizəçinin məhkəmə baxışına qədər, 11 yanvar 2017-ci il tarixinədək həbsdə saxlanılmasına qərar verib. Sonradan ərizəçinin həbs müddəti daha iki ay uzadılıb. Apellyasiya instansiyası həmin qərarlardan verilmiş şikayətləri rədd edib.

Bu işdə tərəflər dostca anlaşıblar, anlaşmaya əsasən, ərizəçiyə mənəvi zərər əvəzi 6600, hüquqi xərclər üçün 1500 avro ödəniləcək.

"Abgül Süleymanov Azərbaycana qarşı" işində ərizəçi 2012-ci ildə bir sıra cinayətlərdə ittiham olunaraq, on bir il müddətinə azadlıqdan məhrum etmə cəzasına məhkum edilib. Ərizəçi həmçinin, dini etiqad azadlığı, ifadə azadlığı, toplaşmaq azadlığı hüququnun Konvensiyanın 18-ci maddəsinə zidd olaraq pozulduğunu iddia edirdi.

Bu iş üzrə qərardad da tərəflərin dostca anlaşmalarına əsaslanır. Anlaşmaya əsasən, hökumət ərizəçiyə 7000, onun vəkilinə 2000 avro təzminat ödəyəcək.

Digər işlər üzrə ərizələr toplaşmaq azadlığı ilə bağlıdır və hökümət bu işlər üzrə də şikayətçilərə təzminat ödəyəcək. 0