Avropa Məktəbinin növbəti buraxılış tədbiri keçirilib

Bakı/23.06.21/Turan: Tbilisidə Şərq Tərəfdaşlığı Avropa Məktəbində ikinci tədris ilinin yekunlarına həsr olunmuş onlayn buraxılış tədbiri keçirilib.

Şərq Tərəfdaşlığı Proqramının ictimaiyyətlə əlaqələr xidmətinin məlumatında deyilir ki, tədbirdə Gürcüstanın Təhsil və Elm naziri Mixeil Çxenkeli, Avropa Komissiyasının Şərq Qonşuluğu proqramının rəhbəri Lourens Meredit, BMT-nin Layihələrə Xidmət üzrə İdarəsinin icraçı direktoru Qrete Faremo iştirak edib.

Bu il məktəbi altı Şərq Tərəfdaşlığı ölkəsindən – Azərbaycan, Ermənistan, Gürcüstan, Ukrayna, Moldova və Belarusdan 34 məzun bitirib. “Beynəlxalq Bakalavriat” (IB) Diplom Proqramı üzrə təhsil almış bu məzunlar ali təhsillərini Avropa, ABŞ və öz doğma ölkələrindəki universitetlərdə davam etdirə bilərlər.

Məzunlar artıq İspaniya, Niderland, Macarıstan, İtaliya, Belçika, Estoniya, Birləşmiş Ərəb Əmirlikləri, Qətər, Türkiyə, ABŞ və Kanadada yerləşən məşhur universitetlərdən qismən və tam təqaüdlə oxumağa dəvət olunublar.

34 məzun arasında Bakı şəhərindən olan iki məzun var. Onlar ali təhsillərini müvafiq olaraq Türkiyənin tanınmış Sabancı Universitetində və Niderland Krallığının Maastrixt Universitetində almağı planlaşdırırlar.

Maastrixt Universitetini seçən Azərbaycanlı tələbə Alina Qavriş qeyd edib ki, Avropa Məktəbində təhsil onun sosiallaşmasına, dünyagörüşünü genişləndirməsinə şərait yaradıb.

“Avropa Məktəbində təhsil zamanı müxtəlif və çoxmədəni mühitdə çoxlu sayda yeni materiallar öyrənməli idik”, deyə o qeyd edib.

Avropa Məktəbi 2018-ci ildən fəaliyyətə başlayıb. Məktəbdə iqtisadiyyat, biokimya mühəndisliyi, fizika, sosial elmlər, mədəniyyət, rabitə və media, beynəlxalq əlaqələr, tibb, hüquq, humanitar elmlər və kompüter texnologiyası fənləri tədris edilir. -71D-