Avropa Parlamenti RF-ni postsovet ölkələrinə təzyiqə görə pislədi

Bakı/12.09.13/Turan-BS PRESS: Avropa Parlamenti cümə axşamı Strasburqda keçirilən plenar iclasında Rusiya tərəfindən postsovet ölkələrinə siyasi və iqtisadi təzyiqlər olduğunu bəyan edərək, qətnamə qəbul edib.

Qətnamədə deyilir ki, AP RF tərəfindən Aİ ilə assosiasiya haqqında ikitərəfli sazişlərin yekunlaşdırılması və imzalanması mərhələsində olan Aİ-nin “Şərq Tərəfdaşlığı” proqramının iştirakçısı olan bir sıra ölkələrə qarşı (Ermənistan, Azərbaycan, Gürcüstan, Ukrayna, Moldova və Belarus) “müxtəlif növ” təzyiqləri qəbuledilməz hesab edir. 

“Avropa Parlamenti hesab edir ki, tərəfdaş ölkələr və Aİ arasında proqressiv inteqrasiya onların Rusiya ilə yaxşı qonşuluq münasibətlərinə malik olmaq cəhdləri ilə bir araya sığır... Rusiya Federasiyasını şərq tərəfdaşlarına (Aİ) güclənən təzyiqdən yayınmağa və onların siyasi seçim etmək hüququna tamamilə hörmət etməyə çağırır”, deyə qətnamədə bildirilir.

Parlamentarilər hesab edirlər ki, keçmiş SSRİ ölkələrinin Aİ dəyərləri və normaları əsasında iqtisadi və siyasi islahatlar kursu seçməsi Rusiyanın da maraqlarına uyğundur, belə ki, bu, “onun sərhədləri boyunca sabitlik, çiçəklənmə və əməkdaşlıq zonasını genişləndirməyə” imkan verəcək. Bununla əlaqədar olaraq, AP Avropa Komissiyasını və Aİ-nin xarici siyasət idarəsini birlik tərəfdaşlarının müdafiəsi üçün konkret və səmərəli tədbirlər işləyib hazırlamağa və təqdim etməyə, “bütün “Şərq Tərəfdaşlığı” ölkələrinə onların ümidlərinin və seçiminin dəstəklənməsinə dair siqnal göndərməyə” çağırıb.

Genişlənmə və Avropa Qonşuluq Siyasəti üzrə Avropa Komissarı Ştefan Füle Strasburqda deputatlar qarşısında çıxış edərkən Rusiyanın “Şərq Tərəfdaşlığı” ölkələrinə qarşı hərəkətlərinin beynəlxalq prinsipləri pozduğunu bəyan etmişdi. -02D-