Avropa Şurası Parlament Assambleyası:  Azərbaycan Avropa Şurası qarşısındakı öhdəliklərə əməl etmir

Yanvarın 27-də Strasburqda Avropa Şurası Parlament Assambleyasının qış sessiyasında 2024-cü ildə üzv dövlətlərin vəziyyətilə bağlı müzakirələr aparılıb. Yekunlara əsasən, 2580 saylı qətnamə qəbul edilib. Qətmanədə deyilir ki, Avropa Şurası Parlament Assambleyası  14 ölkədə vəziyyəti izləyən Monitorinq Komitəsinin işini yüksək qiymətləndirir.

Sənəddə Azərbaycan və Gürcüstan da daxil olmaqla, bəzi ölkələrdə demokratiyadan geri çəkilmə və insan hüquqlarının pozulması ilə bağlı narahatlıq ifadə olunub.

Əsasən, Assambleya "Azərbaycanda demokratiyanın, qanunun aliliyinin və insan hüquqlarının getdikcə pisləşməsindən ciddi narahatdır. Xüsusilə də siyasi və vətəndaş fəallarına, KİV nümayəndələrinə və hökumətin digər tənqidçilərinə qarşı davamlı repressiyalardan".

Qətnamədə hakimiyyət təqibləri dayandırmağa və siyasi motivli ittihamlarla tutulanların hamısını dərhal azad etməyə çağırılır.

Hakimiyyət Venesiya Komissiyasının tövsiyələrini nəzərə alaraq, siyasi partiyalar, media və qeyri-hökumət təşkilatları haqqında qanunları dəyişdirməyə çağırılır.

Assambleya həmçinin hakimiyyətin Avropa Şurasının İşgəncələrə Qarşı Komitəsi ilə əməkdaşlıqdan imtina etməsini qətiyyətlə pisləyir.

Bundan əlavə, Assambleya Avropa Şurası Parlament Assambleyasının 2024-cü il növbədənkənar prezident və parlament seçkilərini müşahidə etməyə dəvət olunmamasını pisləyib.

“Beynəlxalq müşahidəçilərin fikrincə, sözügedən seçkilər demokratik beynəlxalq seçki standartlarına cavab verməyib və ifadə, toplaşma və assosiasiya azadlığına məhdudiyyətlərin artması şəraitində keçirilib”.

“Assambleya 26 avqust 2024-cü ildə Azərbaycan Xarici İşlər Nazirliyinin Avropa Şurası Parlament Assambleyasının Azərbaycan nümayəndə heyətinin səlahiyyətlərinin dayandırılmasına səs verən 76 üzvünü persona non grata elan etməsini qətiyyətlə pisləyir və qəbuledilməz hesab edir”.

Avropa Şurası Parlament Assambleyası Azərbaycan hakimiyyətini bu qadağanı dərhal ləğv etməyə və həll olunmamış bütün məsələlər ilə əlaqədar Avropa Şurası orqanları ilə konstruktiv dialoqa başlamağa çağırıb.

Həmçinin qeyd olunur ki, Avropa Şurası Parlament Assambleyası saxlanılan Qarabağ separatçılarının və həbs edilmiş digər ermənilərin" vəziyyətini izləməyə davam edir","bu adamları azad etməklə bağlı Azərbaycana çağırışını təkrarlayır".