Avstriya, Rumıniya, və Litvanın xarici işlər nazirləri Cənubi Qafqaza səfər edəcəklər

Bakı/23.06.21/Turan: Avstriya, Litva və Rumıniyanın xarici işlər nazirləri – Aleksandr Şallenberq, Qabrielyus Landsbergis, Boqdan Auresku 25-26 iyun tarixlərində Ermənistan, Azərbaycan və Gürcüstana səfər edəcəklər.

Nazirləri Aİ-nin Cənubi Qafqaz üzrə xüsusi nümayəndəsi Toyvo Klaar müşaiyət edəcək.

Avropa İttifaqının Azərbaycandakı nümayəndəliyinin məlumatına görə, nazirlər Avropa Komissiyasının vitse-prezidenti, Aİ-nin xarici münasibətlər və təhlükəsizlik üzrə Ali Nümayəndəsi Cozep Borreldən səfər üçün səlahiyyət alıblar.

Səfər Aİ-nin üç Cənubi Qafqaz ölkəsi ilə ikitərəfli münasibətlərinin inkişafına və “Şərq Tərəfdaşlığı” çərçivəsində əməkdaşlığın əhəmiyyətinə həsr olunacaq.

Səfər çərçivəsində nazirlər Aİ-nin münaqişələrin həlli istiqamətində davamlı və hərtərəfli səyləri təşviq etmək və onları fəal şəkildə dəstəkləmək əzmini vurğulayacaqlar.

Nazirlər Azərbaycan prezidenti İlham Əliyevlə, Ermənistan prezidenti Armen Sarkisyan və baş nazir vəzifəsini icra edən Nikol Paşinyanla, Gürcüstan baş naziri İrakli Qaribaşvili ilə görüşəcəklər.

Görüşlərdə həmçinin 2021-ci ilin dekabrında keçirilməsi planlaşdırılan “Şərq Tərəfdaşlığı” sammitinə hazırlıq məsələləri müzakirə olunacaq.

Nazirlərin yekun mətbuat konfransı iyunun 26-da Tbilisidə keçiriləcək. -71D-