AXCP sədrinin müşaviri saxlanılıb

Azərbaycan Xalq Cəbhəsi Partiyası (AXCP) sədrinin müşaviri Məmməd İbrahim sentyabrın 30-da Nərimanov rayon Polis İdarəsində Azərbaycan Cinayət Məcəlləsinin 221-ci (xuliqanlıq) maddəsilə başlanmış cinayət işi üzrə şübhəli şəxs qismində saxlanılıb.

AXCP sədrinin müavini Gözəl Bayramlı bildirib ki, bu barədə Məmməd İbrahimin özü telefonla ona xəbər verib.

Qanunvericiliyə görə, şəxs 48 saatdan artıq şübhəli şəxs qismində saxlanıla bilməz. Bu müddətdə ya təqsirləndirilən şəxs qismində ona qarşı ittiham irəli sürülməli, ya da sərbəst buraxılmalıdır.

Gözəl Bayramlının Facebook səhifəsində yazdığına görə, cinayət işi bir müddət əvvəl AXCP sıralarından uzaqlaşmış Razi Nurullayevin rəhbərlik etdiyi “AXCP Etimad Qurultayı” kimi təqdim edilən qurumun üzvü olan Mikayıl Quliyevin şikayət ərizəsi əsasında başlanıb. Mikayıl Quliyev şikayətində göstərib ki, Məmməd İbrahim küçədə ona qəfil hücum edərək vurub.

Məmməd İbrahim isə əksinə, Mikayıl Quliyevin onu təhqir etdiyini və hücum çəkdiyini bildirib.

Hüquq-mühafizə orqanları AXCP sədrinin müşavirinin saxlanması ilə bağlı hələ şərh verməyib. -03B-