AZAD rəhbəri və ABŞ səfiri Azərbaycandakı vəziyyəti müzakirə ediblər

Demokratiya uğrunda Amerika azərbaycanlıları cəmiyyətinin (AZAD) sədri Elmar Şahtaxtinski çərşənbə axşamı Vaşinqtonda ABŞ-ın Azərbaycandakı səfiri Riçard Morninqstarla görüşüb. Azeri Reportsaytının yaydığı məlumata görə, görüşdə insan hüquqları və demokratiya məsələləri diqqət mərkəzində olub.

“Səfirin cari vəziyyətlə bağlı fikrini və mövqeyini dinləmək və Azərbaycanda demokratiyanın inkişafı üçün öz ideyalarımı bölüşmək çox maraqlı idi. AZAD-ın mövqeyi həmişə ondan ibarət olub ki, Azərbaycanda demokratiya və insan hüquqlarının dəstəklənməsi ABŞ-ın dünyanın bu hissəsində strateji maraqlarının təmin edilməsi üçün həyati əhəmiyyət kəsb edir. Beləliklə, biz hər zaman ABŞ hökumətini bu istiqamətə daha çox diqqət yetirməyə çağırırıq”, deyə Şahtaxtinski bildirib.

Azərbaycanda qarşıda duran prezident seçkilərinə gəlincə, Şahtaxtinski qeyd edib ki, ABŞ azad və ədalətli seçkilər keçirilməsi üçün əsas meyarlara riayət edilməsini tələb etməli və Azərbaycan hökuməti yenə bu standartları pozarsa, dəqiq və birmənalı qiymət verməyə hazır olmalıdır. -25D-