"Azadlıq" radiosunun jurnalisti altı aydır ki, Rusiyada qanunsuz həbsdədir

"Azadlıq" radiosunun jurnalisti Alsu Kurmaşevanın Rusiya tərəfindən əsassız ittihamlarla, konsulluqla əlaqə yaratmasına imkan verilmədən  (amerikalı kimi hüququdur) saxlanılmasından altı ay keçib. O, iki qızı və həyat yoldaşı ilə ünsiyyətdən məhrum edilib.

Ötən ilin mayında ailə vəziyyətilə ilə əlaqədar Tatarıstana gələn Kurmaşeva oktyabrın 18-dən Kazanda saxlanılır. İyunun 2-də qayıdarkən Kazan hava limanında onun pasportu müsadirə edilib. Oktyabrda onu "xarici agent" kimi qeydiyyatdan keçməkdən imtina etmək ittihamı ilə saxlayıblar. İki ay sonra ona qarşı Rusiya ordusu haqqında yalan məlumat yaymaq ittihamı irəli sürülüb.

"Biz Alsu Kurmaşevanın saxlanmasından çox narahatıq və bu işi diqqətlə izləyirik", - brifinq zamanı Dövlət Departamentinin mətbuat katibinin müavini Vedant Patel Turan-ın suallarını cavablandırarkən deyib.

"Biz Alsuya konsulluq imkanlarının yaradılmasına nail olmağa çalışırıq", -  o əlavə edib.

Mətbuat və KİV azadlığını müdafiə qrupları daim Dövlət Departamentini Kurmaşevanı qanunsuz saxlanılan şəxs kimi tanımağa çağırır ki, bu da onun azad edilməsi üçün ABŞ hökumətinin əlavə resurslarını açacaq.

Turan-ın “Həbsxanada Kurmaşevaya qarşı amansız rəftar ABŞ hökumətinin onu qanunsuz saxlanılan şəxs kimi tanıması üçün yetərli əsasdırmı?”  sualının cavabında Patel deyib ki, Vaşinqton onunla əlaqə yaradılmasına israr etməyə davam edir. "Mən bu işlərin necə həll olunduğunun təfərrüatlarına varmayacam. Jurnalistika, şübhəsiz ki, cinayət deyil və əlbəttə, heç kimi, sadəcə, öz işini gördüyünə görə həbs etmək olmaz", - Patel deyib.