Azərbaycan Bandung prinsiplərini əldə rəhbər tutacaq - İlham Əliyev

Bakı /.25.10.19 / Turan: Qoşulmama Hərəkatına sədrliyi dövründə  Azərbaycan fəaliyyətini   Bandung prinsipləri –  dövlətlərin ərazi bütövlüyünə hörmət, daxili işlərə qarışmamaq, qarşılıqlı mənafelərin qorunması və sərhədlərin zorla dəyişdirilməsinin yolverilməzliy  – üzərində quracaqdır. Bunu bu gün Prezident İlham Əliyev Qoşulmama Hərəkatının sammitində çıxış edərkən  deyib.

Əliyev BMT-nin islah edilməsi və beynəlxalq problemlərin həllində onun rolunun artırılmasının vacibliyini qeyd edib.

Sədrliyi dövründə Bakı həmçinin digər beynəlxalq qurumlarla dialoqu dəstəkləyəcəkdir.

Əliyev  90-dan çox dövlətə yardım edən Azərbaycanın yoxsulluqla  mübarizəyə verdiyi töhfələrdən də danışdı. Rəsmi Bakı Qoşulmama Hərəkatı ölkələrinin vətəndaşlarına ölkənin ali məktəblərində ödənişsiz təhsil almaq üçün təqaüd verir. 2018-ci ildə təqaüd 31 ölkədən olan 37 tələbəyə verilib.

Hazırkı zirvə görüşü  çərçivəsində Bakıda 40  Qoşulmama Hərəkatı  ölkəsi  nümayəndələrinin iştirak etdiyi Gənclər Sammiti də keçirilir.

Daha sonra prezident Qarabağ münaqişəsinə toxunataraq   Ermənistanın təcavüzü nəticəsində Dağlıq Qarabağ və onunla həmmərz 7 rayonun –Azərbaycan ərazisinin 20%-nin – işğal edildyini, Ermənistanın bu torpaqlarda apardığı etnik təmizləmə nəticəsində 1 milyon insanın qaçqın və məcburi köçkünə çevrildiyini xatırlatdı.

Prezident Ermənistanın 1992-ci ilin fevral ayında Xocalı şəhərində törətdiyi soyqırım nəticəsində 613 nəfərin, o cümlədən 106 qadın və 63 uşağın qətlə yetirildiyini də iştirakçılarlın  yadına saldı.

İlham Əliyev onu da vurğuladı ki, BMT Təhlükəsizlik Şurasının 1993-cü ildə erməni qoşunlarının işğal olunmuş ərazilərdən dərhal çıxarılmasını tələb edən 4 qətnamə qəbul etdiyinə rəğmən, 26 ildir ki, bu qətnamələrə məhəl qoyulmur. Dağlıq Qarabağ, qədim, əzəli Azərbaycan torpağıdır və münaqişə yalnız Azərbaycanın ərazi bütövlüyü çərçivəsində həll edilə bilər.

Əliyev həmçinin rəsmi Bakının müstəqil siyasət yürütdüyünü də qeyd etdi: ABŞ-Rusiya, NATO-Rusiya formatında həmin ölkə hərbiçilərinin Bakıda müntəzəm olaraq görüşlər keçirməsi bu müstəqil siyasətə ehtiram göstərildiyinə şəhadət edir.

Əliyev Azərbaycanın qlobal enerji təhlükəsizliyi və beynəlxalq nəqliyyat dəhlizləri layihələrində iştirak etdiyini dir daha bildirdi . -06B-