Azərbaycan-Belçika siyasi məsləhətləşmələri keçirilib

Bakı/31.05.18/Turan: Azərbaycan Belçika ilə bütün sahələrdə əməkdaşlığın dərinləşdirilməsində maraqlıdır.

Azərbaycan və Belçika xarici işlər nazirlikləri arasında keçirilmiş siyasi məsləhətləşmələrdə xarici işlər nazirinin müavini Xələf Xələfov belə deyib. Bu haqda XİN-in mayın 30-da yaydığı məlumatda bildirilir.

İqtisadi sahədə əməkdaşlıq münasibətlərinin inkişafı üçün geniş potensialın olduğunu bildirən X.Xələfov ölkələr arasında ticarət dövriyyəsinin iki ölkənin potensialına uyğun olmadığını və mövcud imkanlardan tam istifadə edilməsinin zəruriliyini qeyd edib.

Azərbaycanın təşəbbüsü və iştirakı ilə həyata keçirilən irimiqyaslı nəqliyyat və infrastruktur layihələri haqqında bilgi verən X.Xələfov Şimal-Cənub və Şərq-Qərb nəqliyyat marşrutlarının, Bakı-Tbilisi-Qars dəmir yolu xəttinin Asiya ölkələrinin Avropa bazarlarına çıxması üçün əlverişli imkanlar yaratdığını diqqətə çatdırıb.

Məsləhətləşmələrdə Dağlıq Qarabağ münaqişəsinin, Azərbaycan - Avropa İttifaqı münasibətlərinin də diqqət mərkəzində olduğu bildirilir. X.Xələfov Azərbaycanın Avropa İttifaqı ilə münasibətlərin inkişafında maraqlı olduğunu bildirib.

Belçika Xarici İşlər Nazirliyinin ikitərəfli əlaqələr üzrə baş direktoru Anik Van Kalsterin iki ölkə arasındakı münasibətlərin cari səviyyəsini yüksək qiymətləndirdiyi bildirilir. O, deyib ki, enerji sahəsində Azərbaycan Avropa İttifaqının, xüsusilə Belçikanın strateji tərəfdaşıdır.

Görüşdə iki ölkə arasında humanitar, kənd təsərrüfatı, bərpa olunan enerji, turizm və digər sahələrdə əməkdaşlıq imkanları müzakirə edilib. Mədəni əlaqələrin təşviqi və viza sadələşdirilməsi məsələlərinə diqqət yetirilib.--0--