Azərbaycan, Ermənistan, Fransa prezidentlərinin üçtərəfli Paris görüşü

Bazar ertəsi Parisdə Fransa prezidenti Fransua Olandın vasitəçiliyi ilə Azərbaycan və Ermənistan prezidentləri İlham Əliyevlə Serj Sarkisyanın görüşü keçirilir.

Danışıqların növbəti raundunda baza sənədi kimi ATƏT-in Qarabağ münaqişəsi üzrə Minsk Qrupu həmsədrlərinin son təşəbbüsü olacaq. Bu təşəbbüs mayın 10-da həmsədr Ceyms Uorlik tərəfindən səslənib.

O, Twitter-də öz mikrobloqunda prezidentlərin görüşünün müsbət nəticə verəcəyinə ümidvar olduğunu bildirib.

Fransa prezidenti bu il mayın 11-12-də Cənubi Qafqaza turne zamanı münaqişənin mərhələli həlli ilə bağlı həmsədrlərin təşəbbüsünə Azərbaycan və Ermənistan prezidentlərinin ilkin reaksiyasını özü üçün dəqiqləşdirib.

Bakı və Yerevandan mətbuata sızan qiymətləndirmələr göstərib ki, tərəflər təkmilləşdirilmiş Madrid prinsiplərindən məmnun deyillər. İdeyanın ağırlığı Azərbaycanın təkid etdiyi ərazi bütövlüyü prinsipinin və erməni tərəfinin əsaslandığı millətlərin öz müqəddəratını təyinetmə prinsipinin  bir araya sığmamasıdır.

Bu iki prinsipin razılaşdırılmasının mümkün olmaması iyulun sonlarında cəbhədə vəziyyətin növbəti dəfə kəskinləşməsinə və o zaman prezidentlərin Parisdə planlaşdırılmış üçtərəfli görüşünün pozulmasına səbəb olmuşdu.

Bunun əvəzinə İ.Əliyev və S.Sarkisyan RF prezidenti Vladimir Putinin vasitəçiliyi ilə avqustun 10-da Soçidə görüşüblər. Tərəflər zorakılıq hərəkətlərinin tətbiqindən imtina etmək, payıza keçirilmiş Paris görüşünə hazırlığa başlamaq barədə razılığa gəliblər.

Prezidentlərin son görüşü sentyabrın 4-də Uelsdə ABŞ dövlət katibi Con Kerrinin vasitəçiliyi ilə keçirilib. Danışıqlardan sonra Azərbaycan və Etmənistan prezidentlərin yaxın ətrafının qarşılıqlı təhqirləri göstərib ki, tərəflər Paris görüşü ilə yeni yanaşmalara hazır deyil.—0—