Azərbaycan Ermənistanı iki ölkənin sərhəd xətti boyunca gərginliyin yaradılmasında ittiham edib

Bakı/16.07.21/Turan: Bakı Yerevanı iki ölkənin sərhəddində Naxçıvan Muxtar Respublikasında Azərbaycanın mövqelərini atəşə tutmaqda ittiham edib.

Azərbaycan "iki ölkənin dövlət sərhəddi boyunca gərginliyin yaradılmasına görə” məsuliyyəti Ermənistanın üzərinə qoyub.

"İyulun 16-da saat 10:00-da və 13:00-da Ermənistan Silahlı Qüvvələrinin bölmələri Ermənistan-Azərbaycan dövlət sərhəddində Naxçıvan Muxtar Respublikasının Sədərək rayonu istiqamətində Azərbaycan ordusunun mövqelərini müxtəlif çaplı silahlardan atəşə tutublar. Atəşin qarşısının alınması məqsədilə Ermənistan Silahlı Qüvvələrinin Vedi rayonunun Arazdəyən kəndi yaxınlığında yerləşən bölmələrinə cavab atəşi açılıb",- Azərbaycan Müdafiə Nazirliyinin press-relizində deyilir.

Azərbaycan ordusunun şəxsi heyəti arasında ölən və yaralanan yoxdur, məlumatda bildirilir.

"Növbəti dəfə bəyan edirik ki, Ermənistan iki ölkənin dövlət sərhəddi boyunca gərginliyin yaradılmasına görə tam məsuliyyət daşıyır", - məlumatda vurğulanır.-0-