Azərbaycan, Gürcüstan və Türkiyə birgə hərbi təlimlər keçirəcək

Bakı/28.09.22/Turan: Gürcüstanda rəsmi səfərdə olan müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev sentyabrın 28-də Gürcüstanın Müdafiə Qüvvələrinin komandanı Giorgi Matiaşvili ilə görüşüb.

Azərbaycan Müdafiə Nazirliynin mətbuat xidmətinin məlumatına görə, görüşdə regionda sülhün və təhlükəsizliyin təmin olunması məsələləri, iki ölkə arasında hərbi əməkdaşlığın cari vəziyyəti və inkişaf perspektivləri müzakirə olunub.

"Tərəflər həmçinin regional iqtisadi layihələrin təhlükəsizliyinin təmin edilməsi, hərbi-texniki, hərbi təhsil, hərbi tibb və digər sahələrdə əməkdaşlığın daha da genişləndirilməsinə dair fikir mübadiləsi aparıblar. Saçxeri Dağ Hazırlığı Məktəbində təşkil olunan kurslarda Azərbaycan Ordusunun hərbi qulluqçularının iştirakı və hazırlığının davam etdirilməsi müsbət qiymətləndirilib", deyə xəbərdə qeyd edilir.

Görüşdə ikitərəfli və üçtərəfli Azərbaycan-Gürcüstan-Türkiyə formatında, həm də NATO çərçivəsində təlimlərin həyata keçirilməsinin vacibliyi vurğulanıb.

Tərəflər həmçinin Azərbaycan, Türkiyə və Gürcüstan hərbiçilərinin iştirakı ilə cari ilin oktyabrında keçiriləcək "Qafqaz Qartalı-2022" xüsusi təyinatlı bölmələrin birgə təliminə hazırlıq, həmçinin gələn il ərzində keçirilməsi nəzərdə tutulan "Eternity-2023" kompüter dəstəkli komanda-qərargah təlimi və "Qafqaz Qartalı-2023" birgə təliminin yüksək səviyyədə təşkili barədə müzakirələr aparıblar. Bildirilib ki, birgə hərbi təlimlər ordularımız arasında qarşılıqlı uzlaşma və döyüş hazırlığı səviyyəsinin artırılmasına, habelə təcrübə mübadiləsinin aparılmasına geniş imkanlar yaradır.

Azərbaycan və Gürcüstan hərbi komandanları hər iki dövlətin ərazi bütövlüyü, müstəqilliyi və suverenliyinin qarşılıqlı şəkildə dəstəkləndiyini qeyd edib, iki ölkə arasında münasibətlərin strateji tərəfdaşlıq səviyyəsində olmasının hərbi əməkdaşlığın daha da inkişaf etdirilməsi üçün əlverişli şərait yaratdığını və bu əməkdaşlığın hərbi qurumların maraqlarına cavab verdiyini xüsusi vurğulayıb.

Görüşdə Azərbaycan-Gürcüstan hərbi əməkdaşlığının regionda sabitliyin və təhlükəsizliyin təmin edilməsinə yönəldiyi qeyd olunub. 03