Azərbaycan hakimiyyəti müxalifətlə mübarizə aparırkən erməni lobbisi ABŞ Konqresində vəziyyətə nəzarət edir

Vaşinqton/22.07.20 /Turan: Bazar ertəsi ABŞ Konqresi konqresmen Frenk Pallonenin Müdafiə Nazirliyini hərbi yardım proqramına nəzarəti gücləndirməyə çağıran düzəlişini qəbul edib. Bu proqram çərçivəsində Azərbaycan müdafiə məqsədilə 100 milyon dollardan çox alıb.

Bu, ermənipərəst qanunvericilərin dövlət müdafiəsi haqqında qanuna (NDAA - H. R. 6395) Azərbaycan əleyhinə bir sıra dəyişikliklər etməsindən sonra baş verib.

Müdafiə vasitələrinin Azərbaycana verilməsinin məhdudlaşdırılmasını təklif edən dörd düzəlişdən ikisi (biri Bred Şerman tərəfindən təqdim olunub) və Ermənistan və Azərbaycana hərbi yardım paritetinin bərpasını nəzərdə tutan ikinci düzəlişə ABŞ Konqresi Qaydalar Komitəsinin qərarına əsasən baxılmayıb.

Buna azərbaycanlı fəalların Vaşinqtonda bir sıra konqresmenə müraciəti səbəb olub. Onlar konqresmenləri Ermənistanla Azərbaycan arasında son toqquşmalar fonunda öz bəyanatlarında “qərəzsiz, ədalətli və obyektiv olmağa” çağırıblar.

Bundan əlavə, Azərbaycan Demokratik Qüvvələrinin Milli Şurası da ötən həftə ABŞ Konqresinin üzvlərinə müraciət edərək “ABŞ hökumətininin Azərbaycana hərbi yardım göstərməsini qadağan edən düzəlişi qəbul etməməyi” xahiş edib.

Bazar ertəsi ermənipərəst konqresmen Pallone öz bəyanatında iddia edib ki, onun düzəlişi “bütün dünyada insan hüquqlarının müdafiəsini gücləndirəcək”. “Bu düzəliş insan hüquqlarının pozucusu – Azərbaycan prezidenti İlham Əliyev də daxil olmaqla, diktator rejimlərinə böyük vəsaitlər ayıran Müdafiə Nazirliyi üzrə proqrama nəzarətlə bağlı vacib addımdır”.

ABŞ Konqresində bu diskussiyaların fonunda Bakıda polis iyulun 15-dən orduya dəstək olaraq keçirilmiş “Qarabağ mitinqi” ilə əlaqədar Xalq Cəbhəsi Partiyasının onlarla fəalını həbs edib.

Mitinq zamanı müxalifət partiyalarına aidiyyatı olmayan bəzi nümayişçilər parlamentin binasına daxil olaraq iğtişaşlar törədiblər.

Bu arada da Konqresin ermənipərəst üzvləri çərşənbə axşamı başqa əsas qanuna – “Xarici əməliyyatların maliyyələşdirilməsi haqqında” qanuna yeni düzəlişlər ediblər. Düzəlişlərdə məqsəd Qarabağ ermənilərinə yardım etmək və Ermənistana yardımı artırmaqdır. Hər iki düzəliş cümə günü müzakirə olunacaq.

Qeyd edək ki, NDAA - H.R.6395 qanun layihəsi dövlət katibinin müdafiə naziri ilə birlikdə Ukrayna, Gürcüstan, Moldova və Azərbaycanda daxili köçkünlərin vəziyyətinə dair məruzəni Konqresə təqdim etməsini nəzərdə tutur. Sənəd aşağıdakı qiymətləndirməni əhatə etməlidir:

(1)1991-ci ildən xarici qüvvələr tərəfindən bu ölkələrin qanunsuz olaraq işğal edilmiş ərazilərindən məcburi şəkildə çıxarılan Ukrayna, Gürcüstan, Moldova və Azərbaycan vətəndaşlarının sayı;

(2) 1991-ci ildən xarici qoşunlar tərəfindən qanunsuz işğal edilmiş ərazilərdə öldürülmüş Ukrayna, Gürcüstan, Moldova və Azərbaycan vətəndaşlarının sayı.

Erməni lobbisi məhz bu maddələrə görə həyəcan təbili çalaraq qanun layihəsini “misli görünməmiş antierməni qətnaməsi” kimi qiymətləndirib.

Erməni tərəfin rəyinə əsasən əgər sənəd Senat tərəfindən də qəbul olunarsa, Ermənistan üçün ciddi başağrısına çevriləcək.-25В-