Azərbaycan hökumətinin işçi qrupu Qarabağ ermənilərinə yardım tədbirləri haqqında məlumat yayıb

Bakı/23.09.23/Turan: Azərbaycan prezidentinin tapşırığı ilə Qarabağda sosial, humanitar, iqtisadi və infrastruktur məsələlərinin həlli üçün baş nazirin müavini Şahin Mustafayevin başçılığı ilə işçi qrup yaradılıb.

Bu barədə Azərbaycan Prezident Administrasiyasının məlumatında deyilir. 

İşçi qrup Azərbaycan Respublikasının azad olunmuş ərazilərində məsələlərin mərkəzləşmiş həlli üzrə Əlaqələndirmə Qərargahı çərçivəsində fəaliyyət göstərir. 

İşçi qrupun tərkibinə İqtisadiyyat, Əmək və Əhalinin Sosial Müdafiəsi, Kənd Təsərrüfatı, Daxili İşlər, Səhiyyə, Elm və Təhsil nazirlikləri, "Azərenerji" ASC, "Azərişıq" ASC, "Azəriqaz" İstehsalat Birliyi, Avtomobil Yolları Dövlət Agentliyi və digər qurumlar daxildir. 

2023-cü il sentyabrın 20-dən etibarən İşçi Qrup tərəfindən aşağıdakı tədbirlər həyata keçirilib:

2023-cü il sentyabrın 22-də FHN erməni sakinlər üçün 40 tonluq ərzaq məhsulları və gigiyenik vasitələrdən ibarət 2 yük avtomobili və 2 çörək dolu avtomobil fəaliyyətdə olan Ağdam-Əsgəran-Xankəndi yolu ilə yola salıb;

Erməni sakinlərin ilkin tibbi yardım və qida ilə təmin olunması məqsədilə FHN Ağdam, Füzuli və Kəlbəcərdə 1000 nəfərlik çadır düşərgələri qurub. Ərazidəki polis qüvvələri, hərbi heyət və mülki işçilər erməni sakinlərə yerlərdə ilkin tibbi yardım və müvafiq dəstək göstərir;

Sentyabrın 21-də Yevlaxda keçirilmiş görüşdə erməni sakinlərin nümayəndələrinin xahişi ilə ilk növbədə, bağçalar, təcili tibbi yardım və yanğınsöndürmə xidmətləri olmaqla yanacaq-sürtgü materiallarının göndərilməsi təmin ediləcək;

Sülhməramlıların istifadəsi, eləcə də mülki əhaliyə çatdırılması üçün Laçın-Xankəndi yolu ərzaq və gündəlik tələbat mallarının keçidi üçün açılır;

Beynəlxalq Qırmızı Xaç Komitəsi (BQXK) tərəfindən Ağdam-Əsgəran-Xankəndi və Laçın-Xankəndi yolu ilə ərzaq, dərman preparatları və uşaq qidasından ibarət yüklərin aparılmasına, təşkilatın Bakı və Cenevrə ofislərindən Xankəndidə olan alt-ofisinə əlavə heyətin ezam olunmasına şərait yaradılıb;

BQXK-nin sorğusu əsasında Tibbi yardıma ehtiyacı olan şəxslərin Ermənistana təxliyəsi üçün zəruri imkanlar yaradılır. 06B