Azərbaycan koronavirus vaksininin paylaşdırılması ilə bağlı ÜST-ə narazılığını bildirib

Bakı/05.03.21/Turan: Azərbaycan İcbari Tibbi Sığorta üzrə Dövlət Agentliyi Azərbaycanın COVAX platforması çərçivəsində “Pfizer-BioNTech” vaksinlərini əldə edəcək 18 ölkə siyahısına daxil edilməməsi ilə əlaqədar Ümumdünya Səhiyyə Təşkilatına (ÜST) narazılığını bildirib. ÜST tərəfindən təqdim edilən məlumatda 2021-ci il yanvarın 29-na kimi COVID-19 peyvənd proqramına başlamış iştirakçı ölkələrin “Pfizer-BioNTech” peyvəndinin birinci müstəsna paylanma mərhələsinə daxil edilmədiyi qeyd olunub.

Dövlət Agentliyinin bununla bağlı bəyanatında bildirilir ki, Azərbaycanda vaksinasiya ÜST-ün tövsiyələri nəzərə alınmaqla aparılır.

Azərbaycan vaksinlərin dünya ölkələri arasında ədalətlilik və həmrəylik prinsipləri ilə bölgüsünün tərəfdarıdır və təəssüflə qeyd edirik ki, təcrübədə bunun əksi görünür, deyə bəyanatda vurğulanır. 

COVAX layihəsi faktiki olaraq öz öhdəliklərini yerinə yetirə bilmir, vaksinlərin düzgün paylaşdırılmasında ədalətsiz yanaşma birbaşa bu layihənin icrasında ciddi problemlərin olmasından xəbər verir.

Azərbaycan tərəfin mövqeyi COVAX-a ünvanlanmış, qəbul edilmiş qərara yenidən baxılması çağırışı yer alan məktubda əksini tapıb, deyə Azərbaycan İcbari Tibbi Sığorta üzrə Dövlət Agentliyinin bəyanatında qeyd edilir. -02D-