Media-icmal 05.03.21

“Yeni Azərbaycan” Partiyasının (YAP) növbədənkənar qurultayı barədə təxminlər, vətəndaşların daha çox hansı problemlərə görə məhkəmələrə üz tutmaları, qarşıdakı əfv fərmanından gözləntilər və s. məsələlər medianın aparıcı mövzuları sırasındadır...   

“Azpolitika.info” saytında “YAP-ın qurultayı niyə qəfildən keçirilir? - 200 nəfər iştirak edəcək, Prezident də qatılacaq” sərlövhəli məqalədə müəllif bu gün, martın 5-də “Yeni Azərbaycan” Partiyasının (YAP) keçiriləcək növbədənkənar qurultayı öncəsi vəziyyəti dəyərləndirir. 

Bu məsələdə maraq doğuran cəhət bundan ibarət oldu ki, qurultayın keçirilməsi barədə hər hansı rəsmi açıqlama olmadı.

Mediada gedən məlumatlara əsasən, tədbirin partiyanın mərkəzi qərargahında keçiriləcəyi, qurultaya dəvətlilərin koronavirus testindən keçdikləri məlumdur, Prezident İlham Əliyevin də qurultayda iştirakının gözlənildiyi deyilir.

Müəllif yada salır ki, YAP mətbuat xidməti bir neçə gündür ki, zənglərə cavab vermir, YAP-çı deputatların bəziləri qurultaydan xəbərsiz olduqlarını deyir, media təmsilçilərilə təmaslardan imtina edirlər.

Ad çəkmədən açıqlama verən bəziləri isə tədbirin belə qəfil keçirilməsinə səbəb kimi qurultayda YAP rəhbərliyində ciddi dəyişikliklərin gözlənilməsini göstərirlər. Müəllif mənbəyə istinadən deyir ki, YAP İdarə Heyətində, Siyasi Şurasında, Gənclər Birliyində, Qadınlar Şurasında, Mərkəzi İcra Aparatında xeyli üzvlər vəzifələrindən kənarlaşdırıla bilərlər.

“Hakim partiyada böyük dəyişikliklər gözlənilir, ondan narazı qalanlar, qarşı çıxanlar ola bilər. Bu da qurultay qabağı manipulyasiyalara, daxili narazılıqların ictimai müzakirəsinə rəvac verə bilərdi. Ona görə də qurultayla bağlı ictimaiyyətə geniş informasiya verilmədi”, deyə müəlib bildirir. 

Müəllifin sözlərinə görə, qurultayın gündəliyi ancaq Təşkilat Komitəsinə məlumdur, iştirakçılara bu barədə hər hansı informasiya verilməyib.

“Modern.az” saytında “Məhkəmələrdəki ən çox iş sosial təminat və pensiya hüququ pozulması ilə bağlıdır” sərlövhəli məqalədə müəllif vətəndaşların məhkəmələrə daha çox hansı problemlərlə bağlı müraciət etdiklərini nəzərə çatdırır.

Müəllifin sözlərinə görə, Ali Məhkəmə 2020-ci ildə məhkəmələrdə inzibati mübahisələrə baxılması vəziyyətinə dair hesabat açıqlayıb.

Müəllif vurğulayır ki, 2020-ci il ərzində Əmək və Əhalinin Sosial Müdafiəsi Nazirliyinin iştirak etdiyi işlərin sayı 45,7% təşkil edib. Yəni, bütövlükdə 2236 işə baxılıb, bunlardan 1022-si ƏƏSMN-in tərəf kimi iştirak etdiyi işlər olub.

Müəllif əlavə edir ki, 2020-ci ildə məhkəmələrin icraatında olmuş 16344 işin 3731-i (22,9%) sosial təminat və pensiya hüququ ilə bağlı olub. Hüquqların daşınmaz əmlakın dövlət reyestrində qeydiyyata alınması və torpaq mübahisələri ilə bağlı 3928 iş olub ki, bu da 24% deməkdir. Müharibə veteranı adı və vəsiqəsi verilməsi barədə 1896 iş 11,6% təşkil edib.

“Bizimyol.info.az” saytında “Novruz bayramında əfv sərəncamı gözlənilir: kimlər həbsdən çıxa bilər? – açıqlama” sərlövhəli məqalədə gözlənilən əfv fərmanı ilə kimlərin azadlığa çıxa biləcəkləri müzakirə olunur.

Əfv komissiyasından deyildiyinə görə, 5 iclasda 500-ə qədər müraciətə baxılıb. Əfv haqqında Əsasnaməyə uyğun müraciət edən şəxsin yaşı, sağlamlıq durumu, ailə vəziyyəti, maddi ziyan varsa, ödənilib-ödənilməməsi, həbsdə olduğu müddətdə davranışı kimi məqamlara diqqət yetirilir: “Hər bir ərizə ilə bağlı qərar veriləndə mütləq dövlətin və cəmiyyətin maraqları da nəzərə alınır. Yəni şəxsin azad edilməsi dövlətin, cəmiyyətin maraqlarına necə təsir göstərə bilər, bu da çox vacib məsələdir”, deyə bildirilir.

Komissiyadan yada salıblar ki, 2019-cu il martın 16-da imzalanan sərəncamla 432 nəfər əfv olunmuşdu, 2020-ci ilin aprelində isə pandemiya ilə əlaqədar əfv sərəncamı imzalanaraq, yaşı 65-dən yuxarı olan 176 məhkum azadlığa buraxılmışdı.

Hüquq müdafiəçiləri 110 nəfər məhbusun azadlığa buraxılması üçün fevrlaın 15-də həm dövlət başçısına, həm də Əfv Komissiyasına müraciət ediblər.

2015-ci ilin noyabrında Nardaran hadisələrinə, 2018-ci ilin iyulunda Gəncə hadisələrinə görə həbsdə olanlar, şərti olaraq, “Tərtət işi” adlandırılan iş üzrə ağır cəza almış hərbiçilər, Azərbaycan Xalq Cəbhəsi Partiyasının fəalları, 1995-ci ildə “OMON” olaylarına görə ömürlük azadlıqdan məhrum edilmiş üç nəfərin də adı müraciətdə yer alıb.

Hüquq müdafiəçiləri hesab edirlər ki, yuxarıda adları çəkilən kateoqriyadan olan şəxslərə lazım gəldiyindən ağır cəzalar veriblər, dövlətə xəyanət ittihamı üçün mötəbər sübutlar olmayıb.