Azərbaycanın hakim partiyasının növbədənkənar qurultayı “məxfilik” şəraitində keçir

Bakı/05.03.21/Turan: Bu gün Bakıda hakim Yeni Azərbaycan Partiyasının növbədənkənar, VII qurultayı başlayıb. Qeyri-rəsmi məlumatlara görə, qurultayın işində 200 nümayəndə iştirak edir. İlkin məlumata görə, ötən dövr üçün hesabatlar dinlənəcək, partiyanın rəhbər qurumlarına seçkilər keçiriləcək.

Növbədənkənar qurultay çağırılmasının səbəbləri, həmçinin onun keçirilməsi faktı ilə bağlı açıq məlumat verilmir. Növbədənkənar qurultayın VI qurultaydan (8 fevral 2018) cəmi iki il sonra keçirilməsinin səbəbi də məlum deyil.

Qurultaya hazırlıqla bağlı ilk məlumatlar 10 gün əvvəl yayılıb. Həmin vaxtdan etibarən hakim partiyanın ofisi, həmçinin heç bir partiya üzvü forum keçiriləcəyi faktını təsdiq etməyib, onun gündəliyini açıqlamayıb.

Maraqlıdır ki, partiyanın İdarə Heyəti üzvlərinin əksəriyyəti (20 nəfər) vəzifədən kənarlaşdırılmış və ya pensiyaya çıxmış şəxslərdir (keçmiş ideoloq, keçmiş baş nazir müavini Əli Həsənov, BDU-nun sabiq rektoru Abel Məhərrəmov, Bakının keçmiş meri Hacıbala Abutalıbov, partiyanın keçmiş sədr müavini Siyavuş Novruzov, prezident administrasiyasının keçmiş şöbə müdiri Yusif Hümbətov, AzTV-nin keçmiş rəhbəri Nizami Xudiyev, parlamentin keçmiş deputatı Kərim Kərimov, keçmiş deputat Arif Rəhimzadə).

Qeyri-rəsmi məlumatlara görə, bütün bu şəxslər rəhbərlikdən kənarlaşdırılacaq və onların yerinə gənc kadrlar seçiləcək.

Pensiyaçıların və vəzifələrini tərk etmiş şəxslərin qaldığı partiyanın Siyasi Şurasında (84 nəfər) da ciddi təmizlik gözlənilir.

Xatırladaq ki, partiyanın lideri İlham Əliyev, sədr müavini Mehriban Əliyevadır. -02D-