Azərbaycan Milli Elmlər Akademiyası: Ramiz Mehdiyev iş başındadır

Bakı/30.06.21/Turan: Yerli  kütləvi informasiya vasitələrində Azərbaycan Milli Elmlər Akademiyasının prezidenti, akademik Ramiz Mehdiyevin  istefa ərizəsi yazması və yerinə akademiyanın akademik-katibi, akademik Arif Həşimovun təyin ediləcəyi barədə yalan məlumatlar yayılıb. Akademiyadan bildiriblər ki,  belə xəbərlərin əsası yoxdur və onlar həqiqəti əks etdirmir.

“Azərbaycan Milli Elmlər Akademiyasının prezidenti Ramiz Mehdiyev iş başındadır və ölkə prezidenti İlham Əliyevin elm sahəsi üzrə tapşırıqlarının icrası ilə məşğuldur. Bir daha həmkarlarımıza yoxlanılmamış, dedi-qodu xarakterli məlumatları tirajlamamağı, jurnalist etikasının qaydalarına ciddi riayət etməyi tövsiyə edirik”, - akademiyanın ictimaiyyətlə əlaqələr və informasiya şöbəsinin açıqlamasında deyilir.

Bu, akademiyanın prezidenti Ramiz Mehdiyevlə baglı ilk yalan məlumat deyil.  2019-cu  ildə Mehdiyev Prezident Administrasiyasının rəhbəri vəzifəsindən azad olunaraq Elmlər Akademiyasının prezidenti təyin olunandan sonra mətbuat onu “izləyir”,  akademik isə yalan xəbərlərə təkziblər verir. -0-