Azərbaycan ordusu "istənilən təxribatı dəf etməyə" hazır olmağa çağırılıb

Avqustun 3-də Müdafiə Nazirliyində 2024-cü ilin birinci yarımilinin yekunlarına dair geniş tərkibli kollegiya iclası keçirilib.

Müdafiə naziri general-polkovnik Zakir Həsənovun rəhbərliyi ilə videobağlantı formatında keçirilən iclasda nazir müavinləri, qoşun (qüvvə) növü komandanları, baş idarə, idarə, xidmət və müstəqil şöbə rəisləri, hərbi birlik və birləşmə komandirləri, həmçinin xüsusi təyinatlı təhsil müəssisələrinin rəisləri iştirak ediblər.

Müdafiə Nazirliyinın mətbuat xidməti bildirib ki, havadarları tərəfindən silahlandırılan Ermənistanın regionda vəziyyəti gərginləşdirmək məqsədilə şərti sərhəddə törətdiyi təxribatlara qarşı bölmələrimiz tərəfindən həyata keçirilən təxirəsalınmaz tədbirlər və mövcud əməliyyat şəraiti təhlil edilib.

Nazirliyin rəhbər heyəti ordunun müəyyən fəaliyyət istiqamətləri üzrə ətraflı məruzələr təqdim edib.

İclası yekun vuran müdafiə naziri "istənilən təxribatı dəf etməyə hazır olmağın" zəruriliyilə bağlı prezident Əliyevin sözlərini xatırladıb.  “İstənilən təxribatlara qarşı hər an hazır olmaq, heç kimin bizimlə diktat və ultimatum dilində danışa bilməməsi üçün Azərbaycan ordusu döyüş hazırlığını və peşəkarlığını daim yüksək səviyyədə saxlamalıdır”, - Zakir Həsənov deyib və öz mesajını kimə ünvanladığını dəqiqləşdirməyib.