Keçmiş diplomat Emin İbrahimov 11 gündür təcridxanada aclıq edir

Keçmiş diplomat, Şüvəlan İstintaq Təcridxanasında saxlanılan Emin İbrahimov 11-ci gündür  aclıq edir və aksiyanı sonadək davam etdirmək niyyətindədir. Bu barədə Turan-a İbrahimovun ailə üzvlərindən biri avqustun 3-də onunla telefon danışığından sonra bildirib.

Mənbəyə görə, İbrahimov təkadamlıq kamerada saxlanılır, halsızdır, səsi zəifləyib.

Penitensiar Xidmətdən şərh almaq mümkün olmayıb.

Xatırladaq ki, Emin İbrahimov iyulun 22-də saxlanılıb.

O, Azərbaycan Cinayət Məcəlləsinin 126.2.4 ( xuliqanlıq niyyətilə sağlamlığa qəsdən ağır ziyan vurmaq) və 221 (xuliqanlıq) maddələri ilə ittiham olunur. Bu maddələr üzrə  onu 11 ilə qədər həbs təhlükəsi gözləyir. İyulun 24-də məhkəmə onun barəsində həbs qətimkan tədbiri seçib. İbrahimov etiraz əlaməti olaraq aclıq elan edib,

İbrahimov ittihamları rədd edərək onları hakimiyyəti tənqid etdiyinə görə ona qarşı cinayət işinin başlanması ilə əlaqələndirib.

Emin İbrahimov əvvəllər Azərbaycan Xarici İşlər Nazirliyi sistemində çalışıb. 2012-2016-cı illərdə Azərbaycanın ABŞ-dakı səfirliyinin ikinci katibi, 2016-2020-ci illərdə Uruqvayda müvəqqəti işlər vəkili olub. Sonra hökumətin siyasətilə razılaşmadığını bildirərək diplomatik xidmətdən gedib, sosial şəbəkələrdə Azərbaycan hakimiyyətini tənqid edib.