Azərbaycan ordusuna "revanşist qüvvələrin mümkün təxribatlarının qarşısını almaq" əmri verilib

Bakı/02.07.22/Turan: Azərbaycanın müdafiə naziri Zakir Həsənov bu gün nazir müavinləri, qoşun növləri komandanları, nazirliyin baş idarə, idarə və xidmət rəislərinin iştirakı ilə müşavirə keçirib. Azad edilmiş ərazilərdə dislokasiya olunan hərbi birlik, birləşmə komandirləri müşavirəyə videobağlantı vasitəsilə qoşulublar. Tədbirdə nazir "revanşist qüvvələrin mümkün təxribatlarının qarşısını almağa hər an hazır olmaq" barədə göstəriş verib.

"Müşavirədə Azərbaycan-Ermənistan dövlət sərhədindəki və Qarabağ iqtisadi zonasındakı əməliyyat şəraiti geniş təhlil edilib, bölmələrin maddi-texniki və döyüş təminatının gücləndirilməsi, hərbi qulluqçuların xidməti-döyüş fəaliyyətinin təkmilləşdirilməsi, həmçinin şəxsi heyətin sayıqlığının artırılması barədə konkret tapşırıqlar verilib", deyə Müdafiə Nazirliyinin mətbuat xidmətinin məlumatında bildirilir.

Eyni zamanda, azad edilən ərazilərdə dislokasiya olunan hərbi hissələrdə qoşun xidmətinin təşkili, mühəndis təminatı üzrə zəruri tədbirlərin davam etdirilməsi, həmçinin xidməti-döyüş və sosial-məişət şəraitinin daha da yaxşılaşdırılması məqsədilə yeni hərbi infrastrukturun yaradılması istiqamətində görülən işlərlə bağlı göstərişlər verilib. 06B