Azərbaycan Prezidenti Vaşinqtonda Baş Verən Hava Qəzası ilə Bağlı Trampa Başsağlığı Verib

BAKI, 30 yanvar (Reuters) – Azərbaycan Prezidenti İlham Əliyev Vaşinqton yaxınlığında regional sərnişin təyyarəsi ilə hərbi helikopterin havada toqquşması və çoxsaylı insan tələfatına səbəb olan faciədən sonra ABŞ Prezidenti Donald Trampa başsağlığı verib.

"Vaşinqton yaxınlığında sərnişin təyyarəsi ilə hərbi helikopterin toqquşması nəticəsində çoxsaylı insanın həyatını itirməsi xəbəri bizi dərindən kədərləndirdi. Öz adımdan və Azərbaycan xalqı adından sizə, həlak olanların ailələrinə və yaxınlarına, eləcə də dost Amerika xalqına dərin hüznlə başsağlığı verirəm", – Əliyev başsağlığı məktubunda bildirib.

ABŞ Federal Aviasiya Administrasiyasının (FAA) məlumatına görə, American Airlines-in PSA Airlines regional aviaşirkətinə məxsus Bombardier CRJ700 tipli təyyarə çərşənbə axşamı yerli vaxtla saat 21:00 radələrində Sikorsky H-60 Black Hawk helikopteri ilə Potomak çayı üzərində toqquşub. Hadisə təyyarə Ronald Reyqan Vaşinqton Milli Aeroportuna eniş edərkən baş verib.

Təyyarədə 60 sərnişin və dörd heyət üzvü, helikopterdə isə üç hərbi qulluqçu olub. Hər iki hava nəqliyyatı vasitəsi çaya düşüb. Qəza genişmiqyaslı fövqəladə vəziyyət reaksiyasına səbəb olub və 300-ə yaxın xilasedici xilasetmə qayıqları ilə axtarış işlərinə cəlb edilib.

"Güclü külək, soyuq temperatur və sudakı buz parçaları axtarışları son dərəcə çətinləşdirir", – Vaşinqtonun Yanğınsöndürmə Departamentinin rəhbəri Con Donnelli jurnalistlərə bildirib.

Rəsmi şəxslər ölənlərin dəqiq sayını açıqlamayıb. Bununla belə, CBS News hadisə yerində olan polis əməkdaşına istinadən 18 cəsədin sudan çıxarıldığını və sağ qalanların tapılmadığını bildirib. Reuters-ə danışan iki mənbə bir neçə cəsədin sudan çıxarıldığını təsdiqləsə də, rəsmilər həlak olanların ümumi sayını rəsmi olaraq təsdiq etməyib.

Mətbuat konfransında rəsmilər ölüm halları ilə bağlı rəqəmləri paylaşmaqdan imtina edərək diqqətin xilasedici əməliyyatlara yönəldildiyini qeyd edib. Senator Rocer Marşal "təyyarədə olanların çoxunun, əgər hamısının deyil, həyatını itirdiyini" ehtimal edib.

Qəzanın ardından Reyqan Hava Limanında bütün uçuşlar və enişlər dayandırılıb. American Airlines təyyarədə olanların şəxsiyyətini təsdiqləyib, Pentaqon isə helikopterin Virciniyadakı Fort Belvoir bazasından təlim uçuşuna qalxdığını açıqlayıb.

Hadisədən sonra hava limanına toplaşan sərnişinlərin yaxınları rəsmi qurumların informasiya verməməsindən narazılıq bildirib, qəza ilə bağlı detalları əsasən media vasitəsilə öyrəndiklərini deyib.

Bu arada, Rusiyanın TASS agentliyi adının açıqlanmasını istəməyən mənbəyə istinadən keçmiş dünya fiqurlu konkisürmə çempionları Yevgeniya Şişkova və Vadim Naumovun həmin təyyarədə olduğunu iddia edib. Kremlin sözçüsü Dmitri Peskov məlumatı təsdiqləməsə də, "təəssüf ki, bu üzücü məlumatlar öz təsdiqini tapır" deyib.

Vaşinqtondakı Kennedi Mərkəzində yerləşdirilmiş təhlükəsizlik kamerası saat 20:47-də göydə baş verən partlayışı qeydə alıb. Videoda təyyarənin alov içində qalıb sürətlə yerə düşdüyü görünür.

ABŞ Prezidenti Donald Tramp hadisəni "dəhşətli qəza" adlandıraraq xilasedicilərə səylərinə görə təşəkkür edib. "Mən vəziyyəti izləyirəm və yeni məlumatlar əldə etdikcə paylaşacağam", – o, açıqlamasında bildirib. Tramp TruthSocial hesabında "Bu, qarşısı alınmalı olan pis bir hadisədir. YAXŞI DEYİL!!!" yazıb.

ABŞ Müdafiə Naziri Pit Hegseth və Nəqliyyat Naziri Şon Daffi vəziyyəti yaxından izlədiklərini bildiriblər. Daffi Reyqan Hava Limanı yaxınlığında uçuş marşrutlarının dəyişdirilib-dəyişdirilməyəcəyi ilə bağlı suala "lazım gələrsə, müvafiq tədbirlər görəcəyik" cavabını verib.

American Airlines-in baş direktoru Robert Ayzom video müraciətində bildirib ki, şirkət ABŞ Milli Nəqliyyat Təhlükəsizliyi Şurasının (NTSB) araşdırması ilə tam əməkdaşlıq edəcək.

ABŞ-da 2009-cu ildən bəri sərnişin təyyarəsi qəzası baş verməsə də, son illərdə bir sıra təhlükəli insidentlər qeydə alınıb. Bu ərazidə baş verən son böyük aviasiya fəlakəti 1982-ci ildə Air Florida təyyarəsinin Potomak çayı üzərindəki körpüyə çırpılması ilə baş vermiş və nəticədə 74 nəfər həyatını itirmişdi.