Azərbaycan prezidentinin köməkçisi: Kullar postunda baş vermiş hadisə ilə bağlı təəssüfümüzü bildiririk

Bakı/16.06.20/Turan: "Azərbaycan və Rusiya arasında dövlət sərhədinin Dağıstan istiqamətində Məhərrəmkənd rayonu, Kullar postunda baş vermiş hadisə ilə bağlı təəssüfümüzü bildiririk".

Bu barədə Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Rusiya-Azərbaycan sərhədində baş vermiş hadisə ilə bağlı bildirib.

Onun sözlərinə görə, 2020-ci ilin mart ayının sonu, aprel ayının əvvəlindən etibarən Azərbaycan və Rusiya arasında "Samur" sərhəd buraxılış məntəqəsi və beynəlxalq hava limanları vasitəsilə 2976 nəfər Azərbaycan vətəndaşının Rusiyadan ölkəyə geri qayıdışı təmin olunub.

Hökumət rəsmisi deyib ki, Azərbaycan və Rusiyanın aidiyyəti dövlət qurumları tərəfindən qarşılıqlı əlaqələndirmə şəklində vətəndaşların həftəlik əsasda müəyyən olunmuş qrafik çərçivəsində ölkəyə geri qayıdışı təmin olunur. "Həftəlik qrafik çərçivəsində 19 mayda 120 nəfər, 26 mayda 131 nəfər, 2 iyunda 122 nəfər, 9 iyunda 130 nəfər vətəndaş "Samur" sərhəd buraxılış məntəqəsindən ölkəmizin ərazisinə keçib. Bu qrafik üzrə bu gün 150 nəfərdən artıq vətəndaşın ölkəyə keçməsi təmin olunacaq. Həmçinin bu həftə "Evə gedirəm" portalı vasitəsilə qeydiyyata düşmüş vətəndaşların Bakı-Moskva-Bakı çarter reysi ilə geri qaytarılması da nəzərdə tutulub".

Onun sözlərinə görə, vətəndaşların ölkəyə geri dönməsi zamanı, ilk növbədə, yaşlılara, xəstələrə, qadınlara və uşaqlara, ailələrə üstünlük verilir və Azərbaycanda karantin üçün ayrılmış məntəqələrin qəbuletmə imkanları nəzərə alınır.

"Samur" sərhəd-keçid məntəqəsi ətrafına toplaşan vətəndaşlarımız müəyyən edilmiş qaydalara riayət etməli, növbəlilik prinsiplərini pozmamalı və aidiyyəti dövlət qurumlarının öz fəaliyyətlərini həyata keçirmələrinə mane olmamalıdırlar. Mövcud durumda vətəndaşlarımızı anlayış göstərməyə çağırırıq", deyə prezidentin köməkçisi qeyd edib.

Onun sözlərinə görə, ümumiyyətlə, COVID-19 qlobal pandemiyası səbəbindən 2020-ci ilin mart ayının ortalarından etibarən ölkəmizin quru sərhədləri və xüsusi çarter reysləri vasitəsilə 20 min nəfərdən artıq Azərbaycan vətəndaşının ölkəmizə geri qayıdışı təmin edilib. -03D-