Azərbaycan rifah reytinqində 79-cu yeri tutub

Azərbaycan 2014-cü il üçün dünya ölkələrinin rifah reytinqində (2014 Prosperity Index) 142 ölkə arasında 79-cu yeri tutub. Reytinqi Britaniyanın Legatum Institute mərkəzi (Legatum beynəlxalq investisiya qrupunun bölməsi) hazırlayıb.

Bu, ümumi reytinqdə orta göstəricidir, lakin postsovet ölkələri arasında iqtisadi və insan potensialı baxımından münasib deyil. Postsovet ölkələri belə sıralanıb: Estoniya  -32, Litva – 42, Latviya – 44, Belarus – 53, Qazaxıstan – 55, Özbəkistan – 57, Ukrayna – 63,  Rusiya – 68, Qırğızıstan – 74, Gürcüstan – 80, Moldova – 89, Tacikistan – 94, Ermənistan – 95. Türkmənistan məlumat olmadığından siyahıya daxil edilməyib.

Lakin ölkə 2013-cü illə müqayisədə göstəricilərini 2 bənd (81-ci yer), 2012-ci illə müqayisədə 13 bənd (94) yaxşılaşdırıb.

 Legatum Institute indeksi dünya əhalisinin 96%-ni və dünya ÜDM-in 99%-ni təşkil edir. Bu 8 kateqoriya üzrə 79 müxtəlif göstərici əsasında tərtib edilir. Bu göstəricilər cəmiyytin müxtəlif aspektlərini  və ictimai rifahın parametrləri: iqtisadiyyat, təhsil, səhiyyə, şəxsi azadlıq, təhlükəsilzik, sahibkarlıq imkanları, idarəetmə və sosial kapitalı əks etdirir.

Reytinqi hazırlayanlar Azərbaycanda dövlət və korporativ idarəetmə (105), şəxsi azadlıq (102) sahəsində ciddi problemlərin olduğunu qeyd edirlər. Halbuki, son iki ildə hər iki göstərici üzrə müsbət irəliləyişlər nəzərə çarpır. Ən yaxşı göstəricilər iqtisadiyyatda (65-ci yer) və sabibkarlıq imkanları (67) sahəsində qeydə alınıb.  Ölkə təhsil üzrə göstəriciyə görə   83-cü yeri tutub.  Səhiyyə – 89, təhlükəsizlik – 75, sosial kapital – 77.

Reytinqdə birinci yeri Norveç tutub. Onun ardınca İsveçrə, Yeni Zelandiya, Danimarka, Kanada, İsveç, Avstraliya, Finlandiya, Niderland, ABŞ gəlir.-0-