Azərbaycan Saakaşvilini ələ verməz

“Azərbaycanda dövlət xadimləri yüksək postu tərk etdikdən sonra belə onlara olan ehtiramı saxlamaq ənənəsi var. Bu, təkcə özününkülərə deyil, dövlətlərarası münasibətlərin möhkəmləndirilməsinə öz töhfəsini vermiş xarici siyasətçilərə da aiddir”.  Azərbaycanlı politoloq, parlamentin deputatı Rasim Musabəyov Bakıda keçirilən III Qlobal Forumda Gürcüstanın eks-prezidenti Mixail Saakaşvilinin iştirakına rusiyalı KİV-in reaksiyasını şərh edərkən bildirib.

Xatırladaq ki, Gürcüstanın keçmiş prezidenti öz ölkəsində axtarışdadır.

“Saakaşvili komandası Gürcüstanda hakimiyyətə gələndə rəsmi Bakı hörmətcil münasibətini saxladı və eks-prezident Eduard Şevardnadze ilə əlaqələrdən qaçmadı. İndi niyə daim Azərbaycanla müttəfiq münasibətlərə tərəfdar olan Saakaşvilidən üz çevirmək lazımdır?”, - R.Musabəyov vurğulayıb.  

Məhz onun prezidentliyi dövründə Bakı-Tbilisi-Ceyhan neft kəməri, Bakı-Ərzurum qaz kəməri, Bakı-Tbilisi-Qars dəmir yolunun inşasına başlanılıb.

“Gürcüstanın keçmiş prezidenti Mixail Saakaşvilini qəbul etməklə Bakı nümayiş etdirir ki, siyasi konyuktura naminə dostları unutmur, onlardan üz çevirmir. Bu, təkcə istefada olanlar üçün yox, həm də fəaliyyət göstərən xarici siyasətçilər üçün yaxşı əlamətdir”, - R.Musabəyov vurğulayıb.

Qeyd edək ki, aprelin 28-də Gürcüstan prokurorluğu Azərbaycan tərəfinə müraciət edərək Gürcüstanın keçmiş dövlət başçısı Mixail Saakaşvilinin saxlanması və ekstradisiyasını tələb edib.

Ukrayna prezidenti  Petro Poroşenkonun ştatdankənar müşaviri olan  M.Saakaşvili çərşənbə axşamı Bakıya gəlib və III Qlobal Forumda iştirak edib.

“Dünən bizim qurum  Azərbaycan tərəfinə müraciət edərək Mixail Saakaşvilinin saxlanmasını və vətənə ekstradisiyasını tələb edib”, - aprelin 29-da  prokurorluğun mətbuat xidmətinin əməkdaşı Natiya Suxiaşvili bildirib. Onun sözlərinə görə, gürcü tərəfi hələlik Azərbaycandan rəsmi cavab almayıb.

*2014-cü ildə Gürcüstan prokurorluğu qiyabi olaraq Mixail Saakaşviliyə qarşı bir neçə maddə üzrə ittiham irəli sürüb: 8,8 milyondan çox lari həcmində dövlət vəsaitinin öz şəxsi ehtiyacları üçün xərclənməsi, 2007-ci il 7 noyabr aksiyasının dağıdılması zamanı xidməti səlahiyyətini aşması, parlamentin deputatı Valeri Gelaşvilini döyməsi və 2006-cı ildə Gürcüstan Birləşmiş Bankının əməkdaşı Sandro Girqvlianinin qətlə yetirilməsi.—06D-