Azərbaycan Silahlı Qüvvələrinə Qarabağda ermənilərin təxribatlarına qarşı adekvat tədbirlər görmək tapşırılıb

Bakı/11.03.23/Turan: Martın 11-də müdafiə naziri general-polkovnik Zakir Həsənovun rəhbərliyi ilə xidməti müşavirə keçirilib.

Müşavirədə nazir müavinləri, qoşun növü komandanları, nazirliyin baş idarə, idarə və xidmət rəisləri, hərbi birlik komandirləri, həmçinin videobağlantı vasitəsilə hərbi birləşmə komandirləri iştirak ediblər.

Nazirliyin mətbuat xidmətinin məlumatına görə, iştirakçılar Azərbaycan-Ermənistan şərti dövlət sərhədi boyu və Qarabağ iqtisadi rayonundakı əməliyyat şəraiti ətraflı təhlil ediblər.

Qarabağda qalan qeyri-qanuni erməni silahlı birləşmələri üçün hərbi daşımaların və "canlı qüvvənin rotasiyasının" həyata keçirilməsinin "yolverilməz" olduğu bildirilib.

Həsənov düşmənin fəaliyyətini fasiləsiz müşahidə etməyi və Ermənistanın ehtimal edilən təhdidlərinə qarşı "preventiv tədbirlər" görməyi tapşırıb.

"Azərbaycan Ordusu istənilən təxribatın qarşısını almaq üçün qəti zəruri addımlar atacaq", deyə nazir qeyd edib. 02D