Azərbaycan sülhsevərlik reytinqində mövqeyini yaxşılaşdırıb

Bakı/10.06.20/Turan: Azərbaycan 2020-ci il üçün "Qlobal sülhsevərlik indeksi"ndə (Global Peace Index) 163 ölkə arasında 120-ci yeri tutaraq, Sudan və Mərkəzi Afrika Respublikası arasında yerləşib. Məruzə çərşənbə günü, iyunun 10-da İqtisadiyyat və Sülh İnstitutu (IEP) tərəfindən dərc edilib.

Azərbaycanın mövqeyi 12 bənd yüksəlib. Əsas problem Qarabağ münaqişəsi olaraq qalır.

Azərbaycanın ardınca 121-ci yerdə ABŞ, önündə, 9-cu yerdə isə 15 bənd yüksələn Ermənistan var.

DW-nin məlumatına görə, Rusiya 154-cü yeri tutub, bu da siyasi qeyri-sabitliklə bağlıdır. Reytinqdə Ukrayna da "çox aşağı qiymət" alıb (148-ci yer), amma 2018-ci ilin göstəriciləri ilə müqayisədə ölkə nəticəsini 6 bənd yaxşılaşdırıb və indi daha yüksək kateqoriyaya keçmək üzrədir.

Belarus (94-cü yer) və demək olar ki, bütün Mərkəzi Asiya ölkələri "orta" qiymət alıb: məsələn, Moldova (71) və Qazaxıstan (70) bu kateqoriyada yer alıb.

14 ölkə ən sülhsevər ölkə kimi ("çox yüksək qiymət") tanınıb. Siyahıya İslandiya liderlik edir. Onun ardınca Yeni Zelandiya, Portuqaliya, Avstriya, Danimarka, Kanada, Sinqapur, Çexiya, Yaponiya, İsveçrə, Sloveniya, İrlandiya, Avstraliya və Finlandiya gəlir.

Almaniya 2019-cu illə müqayisədə göstəricilərini bir qədər yaxşılaşdırıb (22-ci yerdən 16-cı yerə).

Ümumilikdə planetdə sülhsevərlik səviyyəsi ötən 12 ildə ikinci dəfə azalıb, deyə İqtisadiyyat və Sülh İnstitutunun təsisçisi Stiv Killelea bildirib.

Reytinq tərtib edilərkən üç müxtəlif kateqoriyada, o cümlədən "cəmiyyətdə təhlükəsizlik", "davam edən münaqişələr" və "hərbiləşmə" kateqoriyasında 23 indikator nəzərə alınır. Birinci kateqoriyada, xüsusən, qətllərin səviyyəsinə, məhbusların sayına, polislərin sayına və cinayətkarlığın dərk edilməsinə diqqət yetirilir. Sonuncu meyar üzrə hərbi qulluqçuların sayı, ÜDM-ə nisbətdə silah xərcləri və silah ixracı dəyərləndirilib. Analitiklər dünyanın 160-dan çox ölkəsində vəziyyəti qiymətləndirirlər. —0—