Azərbaycan və Həştərxan vilayəti əməkdaşlığı genişləndirir

Bakı/07.12.22/Turan: Çərşənbə günü Bakıda İlham Əliyevin RF-nin Həştərxan vilayətinin qubernatoru İqor Babuşkinlə görüşündə Azərbaycan və Həştərxan vilayəti arasında əməkdaşlığın genişləndirilməsi məsələləri müzakirə olunub.

Babuşkinin sözlərinə görə, bu ilin 9 ayı ərzində tərəflər arasında yük daşımalarının həcmi 4 dəfə artıb. 

Görüşdə "Şimal-Cənub" nəqliyyat dəhlizi ilə yük daşımalarının təşkili məsələləri diqqət mərkəzində olub.

Xüsusən, Babuşkin "Şimal-Cənub" dəhlizinin keçdiyi xüsusi iqtisadi zonaların limanlarının potensialını birləşdirməyi təklif edib və Azərbaycanın "Ələt" limanını bu təşəbbüsə qoşulmağa çağırıb. Babuşkinin sözlərinə görə, Bakının reaksiyası müsbət olub.

Bundan başqa, gəmiqayırma sahəsində əməkdaşlığın perspektivləri, xüsusən Həştərxan və Bakının gəmi inşaatçıları arasında əməkdaşlıq müzakirə olunub.

Kənd təsərrüfatı sahəsində əməkdaşlıq məsələlərinə ayrıca toxunulub. Dekabrın 8-də hər iki tərəfin aqrar mütəxəssislərinin iştirakı ilə keçiriləcək konfransda bu məsələlərə baxılacaq. 02D