Azərbaycan və İran Xudafərin körpüsünün birgə bərpa edilməsi mümkünlüyünü müzakirə edirlər

Bakı/30.06.22/Turan: Azərbaycan və İran Araz çayı üzərindəki tarixi Xudafərin körpüsünü birgə bərpa edə bilərlər. Bakıda Azərbaycanın mədəniyyət naziri Anar Kərimovun İran İslam Respublikasının mədəni irs, turizm və əl işləri sənayesi naziri Seyid İzzətullah Zərqami ilə görüşündə bu mövzuda müzakirələr aparılıb. 

Mədəniyyət Nazirliyindən verilən məlumata görə, tərəflər Azərbaycanın işğaldan azad edilmiş tarixi torpaqlarında həm müsəlman, həm də xristian dini məbədlərinin bərpasını yüksək qiymətləndiriblər.

Bu zaman Azərbaycanın mədəniyyət paytaxtı olan Şuşa şəhərinin islam dünyası üçün yüksək dəyər kəsb etdiyi vurğulanıb.

Bundan başqa, tərəflər qlobal problemlərdən sayılan islamofobiya ilə mübarizədə birgə əməkdaşlığın önəmini qeyd ediblər.

Nazirlər Qarabağda həyata keçirilən yenidənqurma və bərpa işləri kontekstində İranın təcrübəsindən istifadə edilə biləcəyini vurğulayıblar.

Eyni zamanda, Xudafərin körpüsünün birgə bərpa edilməsi məqsədilə Qarşılıqlı Anlaşma Memorandumu imzalanması məsələsi müzakirə olunub. 

Qarşılıqlı maraq doğuran digər məsələlərlə bağlı da fikir mübadiləsi aparılıb.

Xudafərin körpüləri erkən orta əsrlər dövründə Azərbaycanın müasir Cəbrayıl rayonunun ərazisində Qumlaq və Xudafərin yaşayış məntəqələri yaxınlığında tikilib.

Körpülərdən biri, 15 gözlü körpü işlək vəziyyətdədir və körpüdən piyada keçmək mümkündür. İkinci, 15 gözlü körpü dağıdılmış vəziyyətdədir, yalnız üç orta gözü qalıb. 1993-cü ilin yayından 2020-ci ilin payızına qədər Azərbaycan-İran sərhədinin bu sahəsi erməni işğalı altında olub. Azərbaycan ordusu 2020-ci ilin payızında 44 günlük müharibə zamanı bu əraziləri azad edib. 06В