Azərbaycan və Rusiya müdafiə nazirlərinin danışıqları

Bakı/18.07.20/Turan: RF-nin müdafiə naziri Sergey Şoyqu şənbə günü Azərbaycanlı həmkarı Zakir Həsənovla telefonla danışıb, bu barədə RİA Novosti hərbi-diplomatik mənbəyə istinadla məlumat yayıb.

"Şənbə günü səhər Bakının təşəbbüsü ilə Azərbaycanın müdafiə naziri Zakir Həsənovun Rusiya idarəsinin rəhbəri Sergey Şoyqu ilə telefon söhbəti baş tutub. Söhbət zamanı iki ölkənin hərbi idarələrinin qarşılıqlı münasibətləri və əməkdaşlığı ilə bağlı müxtəlif məsələlər müzakirə olunub", deyə agentliyin həmsöhbəti bildirib.

Bundan başqa, onun sözlərinə görə, Şoyqu Həsənova cümə günü başlamış  qoşunların döyüş hazırlığının qəfil yoxlanması haqqında məlumat verib.

"Rusiyanın müdafiə naziri qeyd edib ki, bu tədbir plan üzrə keçirilir və Azərbaycan-Ermənistan sərhədindəki cari vəziyyətlə heç bir əlaqəsi yoxdur", deyə o qeyd edib.

Rusiyada iyulun 17-də  prezident Vladimir Putinin qərarı ilə Cənub və Qərb hərbi dairələrinin qoşunlarında, mərkəzə tabe olan ayrı-ayrı birləşmələrdə, Hava-Desant Qoşunlarında və hərbi piyada qoşunlarında qəfil yoxlama elan edilib. -0-