Azərbaycan və Rusiya prezidentləri arasında telefon danışığı

Bakı/01.04.21/Turan: Aprelin 1-də Azərbaycan və Rusiya prezidentləri İlham Əliyev və Vladimir Putin arasında telefon danışığı olub. Bu barədə Kremlin mətbuat xidməti məlumat yayıb.

"Dağlıq Qarabağ ətrafında vəziyyət müzakirə olunub. Məmnunluqla qeyd edilib ki, bütövlükdə vəziyyət sabitdir, atəşkəs rejiminə isə durmadan əməl olunur", - məlumatda bildirilir.

"Rusiya hökumət başçısının müavini Aleksey Overçukun Bakıda danışıqları nəzərə alınmaqla, Rusiya, Azərbaycan və Ermənistan liderlərinin 9 noyabr 2020-ci il və 11 yanvar 2021-ci il tarixli bəyanatlarına uyğun olaraq Cənubi Qafqazda iqtisadi əlaqələrin və nəqliyyat kommunikasiyalarının qurulması üzrə işlərin gedişini nəzərdən keçirilib. Bu kontekstdə üç ölkənin baş nazir müavininin həmsədrliyilə işçi qrupunun fəaliyyətinə müsbət qiymət verilib.

Koronavirus infeksiyasının yayılmasına qarşı mübarizədə əməkdaşlıq da daxil olmaqla, ikitərəfli gündəliyin bir sıra aktual məsələlərinə toxunulub. Rusiya-Azərbaycan strateji tərəfdaşlığının möhkəmləndirilməsinin davam etdirilməsi, qarşılıqlı faydalı layihələrin irəliləməsi üçün qarşılıqlı əhval-ruhiyyə təsdiqlənib”, - məlumatda deyilir.

Qeyd edək ki, iki gün öncə Putinin Ermənistanın baş naziri Paşinyanla telefon danışığı olub.

Bu gün Qarabağda sülhməramlıların komandanı general Muradov Yerevanda Ermənistanın Baş Qərargah rəisi Davtyanla görüşüb.16D06-