Azərbaycan və Türkiyə hərbi-texniki əməkdaşlığı genişləndirmək niyyətindədir

Bakı/25.02.20/Turan:  Azərbaycan və Türkiyə bütün məsələlərdə həmrəydirlər və iki ölkənin birliyi sarsılmazdır. Bu, Azərbaycan və Türkiyə prezidentləri İlham Əliyev ilə Rəcəb Tayyib Ərdoğanın fevralın 25-də Bakıda iki ölkə arasında Yüksək Səviyyəli Strateji Əməkdaşlıq Şurasının 8-ci iclasından sonra mətbuata verdikləri bəyanatın leytmotividir.

Ərdoğan bildirib ki, Azərbaycan və Türkiyənin həmrəyliyi bütün məsələlərdə, o cümlədən terrorizmlə mübarizədə özünü göstərir.

O qeyd edib ki,  FETO terror təşkilatına qarşı mübarizədə Türkiyəni ən çox Azərbaycan dəstəkləyib. 

“Ətrafımızda hər tərəfdən terror hadisələri baş verərkən Azərbaycan və Türkiyə sabitlik adasıdır”, - Ərdoğan vurğulayıb.

“Ona görə də ordularımızın güclü olması lazımdır. Bu baxımdan müdafiə sənayemizi gücləndirmək vacibdir”, - Türkiyə prezidenti əlavə edib. 

Qarabağ probleminə toxunan Ərdoğan deyib ki, “Dağlıq Qarabağ münaqişəsi bizim də məsələmizdir”.

“Dağlıq Qarabağ münaqişəsinin Azərbaycanın suverenliyi və ərazi bütövlüyü çərçivəsində nizamlanması bizim ən böyük arzumuzdur”, - o bildirib.

Ərdoğan qeyd edib ki, Qarabağ məsələsində Türkiyə hər zaman Azərbaycanın yanındadır. 

Onun fikrincə, “ATƏT-in Minsk Qrupu Dağlıq Qarabağ münaqişəsinin həllində səmimi hərəkət etmir”.

Fevralın 26-da Xocalı soyqırımının 28-ci ildönümünün qeyd olunacağına toxunan Ərdoğan bu hadisələri “20-ci əsrin ən böyük faciələrindən biri” adlandırıb.

“Qocaların, qadınların aman verilmədən qətlə yetirildiyi Xocalıda  20-ci əsrin ən böyük faciələrindən biri törədilib”, - Ərdoğan bildirib.

Bu gün Bakıda 14 sazişin imzalandığını qeyd edən Ərdoğan preferensial ticarət haqqında sazişi xüsusi vurğulayıb.

Tərəflər eyni zamanda Türkiyədən Naxçıvan Muxtar Respublikasına dəmir yolu və qaz kəmərinin çəkilişi barədə razılığa gəliblər.

Ərdoğan deyib ki, tərəflər 2023-cü ilə qədər əmtəə dövriyyəsinin 15 mlrd. dollara çatdırılmasını hədəfləyir.

Öz növbəsində Azərbaycan prezidenti İlham Əliyev deyib ki, Azərbaycan “hər zaman beynəlxalq arenada bütün məsələlərdə Türkiyənin haqq işini dəstəkləyir”.

Regionda cari proseslər zamanı Azərbaycan dövləti və xalqı birmənalı olaraq Türkiyə dövləti və xalqı ilə birlikdədir, İ.Əliyev qeyd edib.

“Bizim birliyimiz əbədidir. Biz öz gələcəyimizi möhkəm təməl üzərində qururuq”, - o əlavə edib. 

İki ölkə arasında hərbi əməkdaşlığa toxunan Əliyev bunun uğurla davam etdiyini bildirib. Təkcə keçən il 13 birgə təlim keçirilib. 

Azərbaycan müasir Türkiyə silahlarını almağa davam edəcək.

“Biz birgə istehsalın yaradılması məsələsini də müzakirə etdik”, - o deyib.

Qarabağ münaqişəsinə toxunan Əliyev Ermənistanın qeyri-konstruktiv mövqeyini onun həllinə maneə adlandırıb.

Ermənistan rəhbərliyi çox ziddiyyətli bəyanatlar verir və bu, danışıqlar prosesinə böyük zərbədir.

“Gah deyirlər ki, Dağlıq Qarabağ Ermənistandır. Sonra da deyirlər ki, Dağlıq Qarabağ “müstəqil dövlətdir”. Belə çıxır ki, onlar özləri də Dağlıq Qarabağın nə olduğunu bilmirlər. Bilmirlərsə, biz onlara izah edərik: “Dağlıq Qarabağ Azərbaycandır. Bunu biz deyirik, bunu bütün dünya deyir. Bütün dünya Azərbaycanın ərazi bütövlüyünü tanıyır. Dünyanın heç bir ölkəsi Dağlıq Qarabağ adlı qanunsuz qurum tanımır. Problem bizim ölkəmizin ərazi bütövlüyü, suverenliyi, sərhədlərimizin toxunulmazlığı çərçivəsində həll olunmalıdır”, - İ.Əliyev vurğulayıb.—06D-