Azərbaycan xarici işlər naziri İsveçrənin dövlət katibini qəbul edib

Dekabrın 11-də Azərbaycan xarici işlər naziri Elmar Məmmədyarov İsveçrə Konfederasiyasının xarici işlər nazirinin müavini və dövlət katibi İv Rosyeri qəbul edib.

Xarici İşlər Nazirliyinin mətbuat xidmətinin məlumatına görə, görüşdə iki ölkə arasında münasibətlərdən məmnunluq ifadə olunub və  ölkələr arasında hüquq-müqavilə bazasının möhkəmləndirilməsinin vacibliyi vurğulanıb.

Nazir Məmmədyarov İsveçrəli rəsmiyə regional enerji layihələri haqda məlumat verib və Azərbaycanın Avropanın enerji təhlükəsizliyinin təmin olunmasında rolu haqda danışıb. 

Ermənistan-Azərbaycan münaqişəsinə toxunan Elmar Məmmədyarov, mövcud status-kvonun dəyişdirilməsinin vacibliyini deyib.

O, münaqişənin həlli üçün ilk növbədə işğal olunmuş Azərbaycan ərazilərindən Ermənistan silahlı qüvvələrinin çıxarılmasının zəruriliyini bildirib. Həmçinin, nazir danışıqların danışıqlar xatirinə deyil, nəticənin əldə olunması üçün aparılmasının əhəmiyyətini  qeyd edib. “Ermənistan silahlı qüvvələrinin işğal olunmuş Azərbaycan ərazilərindən çıxarılması münaqişənin həlli üçün geniş imkanlar yaradacaq”. 

Münaqişənin dondurulmuş olmadığını bildirən Məmmədyarov, regionda sülhün təmin olunması üçün münaqişənin həlli istiqamətində ciddi işlərin görülməsinin əhəmiyyətini qeyd edib. 

Görüşdə etimad tədbirlərinin həyata keçirilməsi məqsədi ilə Dağlıq Qarabağın azərbaycanlı və erməni icmaları arasında görüşlərin keçirilməsinin vacibliyi qeyd olunub. -03D-