Azərbaycan Xarici İşlər Nazirliyi: Ermənistan danışıqların baş tutmaması üçün atəşkəs rejimini pozur

Bakı/29.09.22/Turan:  “Ermənistan atəşkəsi pozur və Azərbaycan adekvat cavab tədbirləri görəndə bizi ittiham edir. Bu, Ermənistanın danışıqları pozması üçün daha bir bəhanədir”. Bu barədə Azərbaycan Xarici İşlər Nazirliyinin rəsmi nümayəndəsi Leyla Abdullayeva Twitter səhifəsində dövlət sərhədində baş verən atışmalarla bağlı Ermənistan Xarici İşlər Nazirliyinin bəyanatını şərh edərkən yazıb. O, Ermənistanın hər dəfə eyni şeyi təkrarladığını vurğulayıb.

Eyni zamanda, Azərbaycan Xarici İşlər Nazirliyinin rəsmi şərhində deyilir: “Hazırda iki dövlət arasında əlaqələr bərpa olunarkən, müntəzəm görüşlər və beynəlxalq vasitəçilərin regiona səfəri planlaşdırılarkən Ermənistan eyni oyunu oynayır, insanları öz siyasətinin qurbanına çevirir”.

Ermənistandan fərqli olaraq, sülh gündəliyinin təşəbbüskarı olan, işğaldan azad edilmiş ərazilərimizdə irimiqyaslı bərpa, quruculuq və nəqliyyat kommunikasiyalarının açılması üçün sürətlə iş aparan Azərbaycan bölgədə gərginliyin yaranmasında maraqlı deyil. 

Xatırladaq ki, ötən gün Kəlbəcər istiqamətində atışma olub. Nəticədə azərbaycanlı əsgər yaralanıb. Ermənistan üç əsgərinin həlak olduğunu bildirib. 06B0