Azərbaycan Xarici İşlər Nazirliyi Ermənistan Təhlükəsizlik Şurasının bəyanatına cavab verib

Bakı/29.03.22/Turan: Bölgədə gərginliyin artmasının birbaşa səbəbi Ermənistanın üzərinə götürdüyü öhdəlikləri yerinə yetirməməsidir. Bu barədə Azərbaycan Xarici İşlər Nazirliyinin mətbuat xidmətinin Ermənistan Təhlükəsizlik Şurasının 28 mart tarixli bəyanatına dair şərhində deyilir.

Ötən gün Ermənistan Təhlükəsizlik Şurası Azərbaycanı “dərhal” hərtərəfli sülh müqaviləsi üzrə danışıqlara başlamağa çağırıb.

Bununla yanaşı, Ermənistan Təhlükəsizlik Şurası "regionda yeni hərbi eskalasiyaya və etnik təmizləməyə yol verilməməsi üçün beynəlxalq çəkindirmə mexanizmlərinin tətbiqini vacib sayır".

“Məhz Ermənistan tərəfindən üçtərəfli bəyanatın müddəalarının pozulması bölgədə gərginliyi artırır və sülh quruculuğu səylərinə xələl gətirir”, - Azərbaycan xarici siyasət idarəsinin şərhində deyilir.

Beynəlxalq çəkindirmə mexanizmlərinin işə salınmasına gəlincə, hələ ki bəşəriyyət beynəlxalq hüquqdan başqa daha yaxşı çəkindirmə vasitəsi düşünməyib.

Ermənistan  bir tərəfdən beynəlxalq hüququ kobud şəkildə pozub, digər tərəfdən beynəlxalq çəkindirmə mexanizmindən danışa bilməz.

“Bu, ilk növbədə beynəlxalq hüququn prinsiplərinə, o cümlədən dövlətlərin suverenliyinə və beynəlxalq səviyyədə tanınmış sərhədlərinə hörmət, dövlətlərin daxili işlərinə qarışmamaq, beynəlxalq öhdəliklərin yerinə yetirilməsidir”, - Azərbaycan Xarici İşlər Nazirliyinin cavabında deyilir.

Sülh sazişi üzrə danışıqlara başlamaq məsələsinə gəlincə, Bakı bir il öncə Yerevana onu imzalamağı təklif edib. Bir ay öncə Azərbaycan sazişin əsaslanmalı olduğu konkret prinsipləri də səsləndirib.

“Əgər Ermənistan sülh sazişi məsələsinə ciddi addım kimi yanaşırsa, o zaman konkret əməllərə keçmək lazımdır. Azərbaycan da öz növbəsində buna hazırdır”, - məlumatın sonunda deyilir. 06В-