Azərbaycan Xarici İşlər Nazirliyi Ermənistanı sərhəddə təxribatlara son qoymağa çağırıb

Bakı/02.06.21/Turan:  Azərbaycan Xarici İşlər Nazirliyi Ermənistan Silahlı Qüvvələrinin Azərbaycanla sərhəddə növbəti təxribatını pisləyib. Belə ki, iyunun 1-də axşam 40-a yaxın erməni hərbçi Kəlbəcər rayonu ərazisinə daxil olub.

Xarici İşlər Nazirliyinin bəyanatında qeyd olunur ki, Azərbaycan ərazisinə keçən ermən hərbçiləri tətbiq edilmədən Azərbaycan hərbçiləri tərəfindən çıxarılıb.

“Ermənistan tərəfinin iki dövlət sərhəddində davamlı təxribatlara əl atması bu ölkənin məqsədyönlü şəkildə bölgədə vəziyyətin gərginləşdirilməsinə xidmət edən addımlar atdığını nümayiş etdirir”, - sənəddə deyilir.

Azərbaycan Xarici İşlər Nazirliyi  bu cür təxribatların yolverilməz olduğunu bildirir və sərhəd məsələsində fikir ayrılıqlarının danışıqlar yolu ilə həllinin vacibliyini vurğulayır. Azərbaycan iki ölkə sərhədlərinin delimitasiyası və demarkasiyası prosesini dəstəkləyir.

"Biz Ermənistanı beynəlxalq hüquq prinsiplərinə riayət etməyə, sərhəddə gərginliyin lazımsız şəkildə artmasından çəkinməyə və təxribatlara son qoymağa çağırırıq", - Azərbaycan Xarici İşlər Nazirliyinin bəyanatında deyilir.

Qeyd edək ki, Ermənistan Müdafiə Nazirliyi bu ölkə hərcçilərinin Azərbaycan sərhəddini keçməsi faktını inkar edib və bunu dezinformasiya adlandırıb.-06D-