Azərbaycan Xarici İşlər Nazirliyi əsir götürülmüş erməni hərbçiləri terrorçu hesab edir

Bakı/27.05.21/Turan:  Ermənistandan kəşfiyyat qrupunun Azərbaycana keçməsi və ölkə ərazisini minalamaq cəhdi terror fəaliyyəti kimi qiymətləndirilməlidir. Bu barədə mayın 27-nə keçən gecə Kəlbəcər rayonunda 6 erməni hərbçinin əsir götürülməsilə bağlı Azərbaycan Xarici İşlər Nazirliyinin mətbuat xidmətinin şərhində deyilir.

“Son vaxtlar Ermənistan sərhəddə qəsdən gərginliyin artırılması siyasəti həyata keçirilir.  “Keçid yollarını növbəti minalama cəhdləri Azərbaycan hərbçilərinin həyatı üçün ciddi təhlükə ola bilərdi.

Azərbaycan gərginliyin danışıqlar yolu ilə aradan qaldırılmasının tərəfdarıdır və iki ölkə arasında sərhədlərin delimitasiyası və demarkasiyası ilə əlaqədar beynəlxalq ictimaiyyətin çağırışlarını dəstəkləyir”, - məlumatda  qeyd olunur.

Azərbaycan Xarici İşlər Nazirliyi Ermənistanı bu cür əməllərdən çəkinməli və dövlət sərhədlərinə hörmətlə yanaşmağa çağırıb. –71D-