Azərbaycan Xarici İşlər Nazirliyi Fransaya etiraz edib

Bakı/16.11.22/Turan:  Fransanın Azərbaycan Respublikasındakı müvəqqəti işlər vəkili Jülyen Lö Lan Xarici İşlər Nazirliyinə  çağırılıb və  noyabrın 15-də Fransa Senatında Azərbaycanın əleyhinə qəbul edilmiş qətnamə ilə bağlı ona etiraz notası təqdim edilib.

Görüş zamanı Fransa Senatında qəbul edilmiş tamamilə həqiqətdən uzaq, yalan və iftira dolu müddəaların əks olunduğu qətnamənin Azərbaycan tərəfindən qətiyyətlə rədd edildiyi diqqətə çatdırılıb. Bu barədə Azərbaycan Xarici İşlər Nazirliyinin mətbuat xidmətinin məlumatında deyilir.

Həmçinin qətnamənin açıq təxribat xarakteri daşıdığı və sülh prosesinə öz töhfəsini vermək iddiasında olan Fransanın növbəti dəfə ermənipərəst, qərəzli və birtərəfli mövqeyini bariz şəkildə nümayiş etdirdiyi bildirilib.

Azərbaycan Xarici İşlər Nazirliyi qeyd edib ki, “Fransanın bu addımı regionda sülhün bərqərar olmasına, xüsusilə də Azərbaycanla Ermənistan arasında münasibətlərin bir-birinin suverenliyi, ərazi bütövlüyü və sərhədlərinin toxunulmazlığının qarşılıqlı tanınması və hörmət edilməsi əsasında normallaşmasına ciddi zərbə vurmaq məqsədi daşıyır, bölgədə sülhə qarşı olan revanşist qüvvələri həvəsləndirir”.

Bundan əlavə, qətnamə beynəlxalq hüququn norma və prinsiplərini kobud şəkildə pozmaqla yanaşı, Azərbaycanla Fransa arasında “Dostluq, qarşılıqlı anlaşma və əməkdaşlıq haqqında müqavilə”nin (1993-cü il) xüsusilə 2-ci maddəsinin 3-cü bəndi çərçivəsində öhdəliklərə tamamilə ziddir.

Görüşdə Azərbaycan tərəfi Fransadan Azərbaycanın beynəlxalq hüquqla qorunan suverenliyi və ərazi bütövlüyünə qarşı yönələn, onun daxili işlərinə müdaxilə olan addım və bəyanatlardan çəkinilməsini təkidlə tələb edib.

Fransanın müvəqqəti işlər vəkili Azərbaycan tərəfinin müraciətini öz ölkəsinin hökumətinə çatdıracağını bildirib.–06В-