Azərbaycan Xarici İşlər Nazirliyi: Makron Kişinyov görüşünün nəticələrini təhrif edib

Bakı/02.06.23/Turan: Fransa, Almaniya rəhbərlərinin və Avropa İttifaqı Şurası prezidentinin iştirakı ilə Azərbaycan və Ermənistan liderlərinin Kişinyov görüşünün yekunları ilə bağlı Yelisey sarayının bəyanatı tərəflərin mövqelərini əks etdirmir və təhrif edir. Bu barədə Azərbaycan Xarici İşlər Nazirliyinin rəsmi nümayəndəsi Ayxan Hacızadə bildirib.

Avropa İttifaqı Şurasının rəhbəri Şarl Mişel danışıqların təşkilatçısı kimi Kişinyov görüşünün yekunlarına dair mətbuata bəyanat verib.

«Daha sonra Fransa prezidentinin birtərəfli qaydada görüş barədə verdiyi açıqlama tərəflərin mövqeyini əks etdirmir və təhrif edir. Əfsuslar olsun ki, Fransanın belə davranışın sərgilənməsi ilk hal deyil və bu, Azərbaycanla Ermənistan arasında sülh prosesinə, bölgədə sülh və sabitliyə heç də müsbət töhfə vermir”, - Hacızadə deyib.

Qeyd edək ki, Fransa prezidentinin ofisinin bəyanatında deyilir ki, "avropalı liderlər Ermənistan və Azərbaycanı bütün öhdəliklərə, əsasən hərbi əsirlərin tezliklə azad edilməsi öhdəliyinə əməl etməyə çağırıblar. Onlar həmçinin Avropa İttifaqının monitorinq missiyasının Ermənistanın xeyrinə mühüm töhfəsini qeyd ediblər. Nəhayət, onlar Dağlıq Qarabağ erməniləri üçün hüquq və zəmanətlərin müəyyənləşdirilməsinin vacibliyini vurğulayıblar".

Fransa prezidenti "hər hansı  düşmənçilik ritorikasından əl çəkməyin və bölgənin bütün əhalisinin xeyrinə sülhün bərqərarı üzrə səylərin davam etdirilməsinin vacibliyini vurğulayıb".- 06B-