Azərbaycan XİN-də Fransa səfirinə nota təqdim edilib

Bakı/29.10.19/Turan: Fransa səfiri Zakari Qros ötən gün Azərbaycan XİN-ə çağırılıb.  Fransa səfirinə bu ölkənin Overn-Ron-Alplar Regional Şurasının sədri Loran Vokyenin ötən həftə Yerevana etdiyi səfər zamanı Qarabağda separatçı rejimin “xarici işlər naziri” Masis Mayılyan ilə görüşərək onunla “birgə bəyannamə” imzalaması ilə bağlı etiraz notası təqdim edilib.

Xarici işlər nazirinin müavini Xələf Xələfov ilə görüş zamanı  qeyd olunub ki, bəyanatda əksini tapmiş çağırışlar Ermənistan-Azərbaycan Dağlıq Qarabağ münaqişəsinin həlli üzrə danışıqlar prosesinə zərbə vurur və onun formatının dəyişdirilməsinə dair işğalçı Ermənistanın mövqeyinə dəstək ifadə edir.

Səfirə bildirilib ki, Avropa İttifaqının aparıcı ölkələrindən və ATƏT-in Minsk Qrupunun həmsədri olan Fransada yerli və regional hakimiyyət orqanları tərəfindən bu cür qanunsuz “sənədlər”in imzalanması bu dövlətin qərəzsiz vasitəşilik roluna kölgə salır.

Fransa səfirinin diqqəti bu arzu olunmayan tendensiyalara yönəldilərək ondan ölkəsinin XİN-i qarşısında məsələyə müdaxilə etməsi və Azərbaycan tərəfinə izahat verilməsi istənilib.

Öz növbəsində Qros bildirib ki,  yerli və bələdiyyə orqanlarının bu kimi hərəkətləri heç bir hüquqi qüvvəyə malik deyil və Fransa hökumətinin mövqeyini əks etdirmir. O, Dağlıq Qarabağ münaqişəsinin həlli üzrə Fransa dövlətinin mövqeyinin prinsipial və dəyişməz olduğunu vurğulayıb. Səfir L.Vokyenin Yerevana etdiyi səfəri proqramının Fransa hökuməti tərəfindən dəstəklənmədiyini, onun qondarma qurumun nümayəndəsi ilə görüşünün səfərin rəsmi hissəsi bitdikdən sonra baş verdiyini və bu zaman Fransanın Yerevandakı səfirinin təmsil olunmadığını bildirib.06D--