Azərbaycan XİN Ermənistan hakimiyyətinin əsirlərin dəyişdirilməsindən imtina etməsi barədə

Bakı/21.11.18/Turan: Ermənistanın baş naziri səlahiyyətlərini icra edən Nikol Paşinyan Cenevrə konvensiyasında əksini tapmış humanizm prinsiplərini rədd edir. Bu barədə rəsmi Yerevanın hər iki tərəfdəki əsirlərin "hamının hamıya" prinsipi üzrə dəyişdirilməsindən imtina etməsilə bağlı Azərbaycan XİN-in mətbuat xidmətinin şərhində deyilir.

Azərbaycan XİN-in şərhində həmçinin qeyd olunur ki, Paşinyanın əsirlərin dəyişdirilməsindən imtina etməsi ATƏT-in Minsk Qrupunun humanitar fəaliyyətinə məhəl qoymadığını göstərir.

Qeyd edək ki, rəsmi olaraq erməni əsirliyində üç azərbaycanlı var: Şahbaz Quliyev, Dilqəm Əsgərov və Elnur Hüseynzadə. Ş.Quliyev və D.Əsgərov saxlandıqları yerdə, Kəlbəcər ərazisində qətl törətmək ittihamı ilə mühakimə olunublar.

Azərbaycanda isə üç erməni əsir var: Karen Kazaryan, Zaven Karapetyan və 15 il müddətinə həbs olunmuş Arsen Bağdasaryan.

Erməni tərəfi Şahbaz Quliyev və Dilqəm Əsgərovu təxribatçı-cinayətkarlar adlandıraraq əsirlərin mübadiləsini uyğun saymır.-02D-