Azərbaycanın dini konfessiya rəhbərləri 31 mart ilə əlaqədar müraciət qəbul ediblər

Bakı/28.03.18/Turan:Azərbaycandakı dini konfessiya rəhbərləri 31mart-Azərbaycanlıların Soyqırım Günü" ilə bağlı dünya dini liderlərinə paramentlərinə, beynəlxalq təşkilatlara müraciət ünvanlayıblar.

Müraciətdə məqsəd hadisənin 100 ililyi ərəfəsində bunun dünya ictimaiyyətinin, dini liderlərin, parlamentlər və beynəlxalq təşkilatların diqqətinə çatdırılmasıdır.

Sənəddə tarixin müxtəlif çağlarında azərbaycanlılara qarşı törədilən qətliamalara münasibət ifadə edilir və bu hadisələr pislənilir: "Milli, irqi, dini mənsubiyyətə görə törədilmiş soyqırım faktları bəşəriyyətin qan yaddaşında "qara ləkələr" kimi qalır və insanlığa qarşı ən böyük günahlardan hesab olunur. Belə faciəvi soyqırım cinayətlərinə məruz qalan xalqlardan biri də Azərbaycan xalqıdır və bu dəhşətli fəlakətlərin mütəmadi xarakter alması bütün Azərbaycan cəmiyyətini, o cümlədən dini ictimaiyyəti daima narahat edir".

Müəlliflər bu qətliamlara görə, erməni millətçilərini və onların uydurduğu "Böyük Ermənistan" ideyasını günahkar bilir və bu ad ilə etnik təmizləmə və işğalın 200 ildən çoxdur ki, davam etdiyini bildirirlər.

Müracətdə deyilir ki, erməni millətçiləri 1905-ci, 1918-ci, 1992-ci illərdə azərbaycanlılara qarşı qətliamlar törədiblər, yaşadıqları tarixi torpaqlardan çıxararaq ərazilərini əllərindən alıblar.

Azərbaycan xalqına qarşı deportasiya siyasəti 1948-53-cü illərdə də törədilib və 100 minlərlə azərbaycanlı öz ata-baba yurdlarından deportasiya edilib.

Müəlliflər XX əsrin 80-ci illərinin ikinci yarısından sonra erməni lobbi və millətçilərinin Azərbaycana qarşı növbəti təcavüz və etnik təmizləmə siyasətinin başlandğını, hələ də davam etdiyini bildirirlər: "1992-ci ildə erməni ekstremistlərinin qədim Xocalıda həyata keçirdikləri soyqırım aktı isə onların törətdikləri vəhşiliklərin kulminasiya nöqtəsi oldu".

Müəlliflər deyirlər ki, layiqli qiymətini almayan qətliamlar yeni-yeni bəşəri cinayətlərə yol açır: "Hazırda beynəlxalq terrorizmin tüğyan etməsi, bəşəri fəlakətlərə zamanında layiqli hüquqi-siyasi qiymətin verilməməsinin acı fəsadlarıdır".

Sənəddə Xocalı faciəsini Holokost, Hernika, Xatın soyqırımları kimi insanlığa qarşı törədilmiş cinayətlərlə bir sıraya qoyulduğu deyilir.

"Biz, din xadimləri, dini konfessiya rəhbərləri bir daha dünya ictimaiyyətinə, müraciət edərək Azərbaycan xalqına qarşı törədilən qətliamlara siyasi-hüquqi qiymət verməyə çağırırıq", -sənəddə vurğulanır.

Xatırladaq ki, 1918-ci il martın 31-də erməni-bolşevik hərbi birləşmələri Bakıda və Azərbaycanın rayonlarında azərbaycanlılara qarşı qətliam törədbilər. Təkcə Bakı şəhərində 18 min nəfərin qətlə yetirildiyi deyilir. 1998-ci ildə bu hadisə ilə bağlı fərman imzalanıb və həmin fərmanla 31mart Azərbaycanlıların Soyqırım Günü kimi qeyd edilir. --0--