Azərbaycanın xarici işlər nazirinin Luis Bono ilə görüşü

Bakı/03.08.23/Turan: Bu gün Azərbaycanın xarici işlər naziri Ceyhun Bayramov Bakıda səfərdə olan ABŞ Dövlət Departamentinin baş müşaviri Luis Bononu qəbul edib.

Görüşdə regionda mövcud vəziyyət, Azərbaycan və Ermənistan arasında sülh prosesi, bu danışıqların vəziyyəti və perspektivləri müzakirə olunub, Azərbaycan Xarici İşlər Nazirliyinin mətbuat xidməti bildirib.

Bayramov diqqəti ona yönəldib ki, Ermənistan öz öhdəliklərinə zidd olaraq hələ də silahlı qüvvələrini Azərbaycan ərazisindən tam çıxarmayıb, ərazi iddialarını davam etdirir, kommunikasiyaların açılmasına mane olur və bu da regionda sülhə və sabitliyə xidmət  etmir.

Bundan əlavə, o, guya Azərbaycanın Qarabağdakı erməni sakinləri "blokadaya alması", "Laçın" sərhəd-keçid məntəqəsinin "qeyri-legitim" olması barədə Ermənistanın iddialarının əsassız olduğunu qeyd edib.

Ermənistanın Laçın yolunda və "Laçın" sərhəd-keçid məntəqəsinə qarşı təxribatlarını nəzərə alaraq, Azərbaycan erməni sakinlərə yardım göstərmək üçün Ağdam-Xankəndi yolundan istifadə etmək təklifilə çıxış edib və bu, qüvvədə qalır.

Ceyhun Bayramov Azərbaycanın erməni əhalinin reinteqrasiya səylərinə Ermənistanın müdaxiləsinin yolverilməz olduğunu da qeyd edib

Həmçinin qarşılıqlı maraq doğuran digər məsələlər ətrafında fikir mübadiləsi aparılıb. 06B