Azərbaycanla Avropa İttifaqı arasında strateji tərəfdaşlıq haqqında saziş layihəsi təqdim edilib

Azərbaycan xarici işlər naziri Elmar Məmmədyarov Riqada Avropa Komissiyasının üzvü, Avropa İttifaqının qonşuluq və genişlənmə danışıqları üzrə komissarı Yohannes Han ilə görüşüb.

Azərbaycan XİN mətbuat xidmətinin məlumatına görə,  E.Məmmədyarov Azərbaycanla Avropa İttifaqı arasında strateji tərəfdaşlıq haqqında saziş layihəsini Y.Hana təqdim edib.

Azərbaycanın Avropa İttifaqının əksər üzv dövlətləri ilə strateji tərəfdaşlıq münasibətlərinə malik olduğu qeyd olunaraq bu sənəd əsasında Azərbaycanla Avropa İttifaqı arasında əməkdaşlığın strateji müstəvidə inkişafı üçün imkanların yarana biləcəyi vurğulanıb.

Ermənistan-Azərbaycan münaqişəsinin həlli üzrə aparılan danışıqlar prosesi haqqında məlumat verən E. Məmmədyarov münaqişə ilə əlaqədar Azərbaycanın ədalətli mövqeyinə Avropa İttifaqı tərəfindən aydın və birmənalı mövqeyin bildirilməsinin vacibliyini diqqətə çatdırıb.

Görüşdə qarşılıqlı maraq doğuran regional məsələlər ətrafında fikir mübadiləsi aparılıb.

Sənəd layihəsi Avropa İttifaqının xarici siyasət və təhlükəsizlik məsələləri üzrə yüksək nümayəndəsi Federica Moqeriniyə də təqdim olunub.-03D-