Azərbaycanla sərhəddə əzələ nümayişindən sonra İran Vyanada birgə hərtərəfli fəaliyyət planı üzrə danışıqlara qayıdır

Bakı/08.10.21/Turan: İranın xarici işlər naziri Hüseyn Əmir Abdullahiyan bildirib ki, Tehran İranın nüvə proqramı üzrə birgə hərtərəfli fəaliyyət planını yenidən işə salmaq üçün Vyanada danışıqlara qayıdacaq.

«Biz Vyanada danışıqlara qayıdacağıq. İranın praqmatik və nəticəyə yönələn hökuməti üçün danışıqlarda İran xalqının maraqlarının və hüquqlarının tamamən qorunması çox vacibdir. Biz danışıqlara vaxt sərf etməyəcəyik. Amerikalıların öz öhdəliklərinə tam qayıtmaq niyyətində olduqları barədə ABŞ da daxil olmaqla, digər tərəfdən siqnallar almaq bizim üçün üçün vacibdir", - Abduollahiyan deyib.

Eyni zamanda bu gün Tehranda o təkrar edib ki, İran qonşuluqdakı sionistlərə regionda təhlükəsizliyə qorxu yaratmağa imkan verməyəcək. "Yaxın gələcəkdə siz İranın regionda sülh, sabitlik və təhlükəsizliyin təmin olunması istiqamətində səylərinin nəticələrini görəcəksiniz".

"Biz regionla və Qafqazdakı qonşularımızla qarşılıqlı fəaliyyət göstərərək sionistlərə hər hansı kəşfiyyat hərəkatına malik olmağa imkan verməyəcəyik", - o əlavə edib. "Biz kollektiv əməkdaşlıq şəraitində  regionda sülh, sabitlik və təhlükəsizlik üçün lazım olan istənilən addımı atmağa hazırıq".

İranın Birləşmiş Millətlər Təşkilatı Baş Assambleyası Birinci Komitəsindəki nümayəndəsi Heydər Əli Baluci deyib: "Birgə hərtərəfli fəaliyyət planı haqda danılmaz fakt ondan ibarətdir ki, bu planın müddəalarını yalnız İran yerinə yetirib, üç Avropa ölkəsi və Birləşmiş Ştatlar isə bu sənədə uyğun olaraq öz öhdəliklərini yerinə yetirməyiblər.

İran birgə hərtərəfli fəaliyyət planının yerinə yetirilməsinə sadiqdir, bir şərtlə ki,   digər üzvlər də  öz öhdəliklərini yerinə yetirsinlər və bütün ədalətsiz sanksiyalar ləğv edilsin və yoxlanılsın”, - o əlavə edib.

Bundan öncə Turan bildirmişdi ki, İranla Azərbaycan arasında gərginliyin artmasının əsas səbəbi Tehranı nüvə silahını hazırlamaq cəhdlərindən əl çəkməyə məcbur etmək üçün ABŞ-ın təzyiqidir.  Tehran İsrailin müttəfiqi və öz sərhədlərində sionizmin dayağı kimi Azərbaycanı hərbi vasitələrlə hədələyirdi.—0—