Azercell-in keçmiş rəhbəri Moldovanın baş naziri oldu

Moldova parlamenti yeni hökumət başçısını təsdiq edib. Ölkənin baş naziri əvvəllər Azərbaycanın Azercell telekom-holdinqinin rəhbəri olmuş 38 yaşlı Kirill Qaburiç olub.

Qaburiç Slavyan Universitetinin iqtisad fakultəsini bitirib.

2008-2012-ci illərdə Moldcell-in baş direktoru olub, daha sonra Azərbaycanın Azercell mobil rabitə şirkətinin (Moldcell kimi TeliaSonera Eurasia qrupuna daxildir) rəhbəri olub.

Parlament deputatları dörd saatlıq dindirmədən sonra Kirill Qaburiçin namizədliyini təsdiq ediblər.

Yeni baş nazirin əsas baş ağrısı Moldovadakı kəskin iqtisadi böhran olacaq. Hökumətin təsdiq etməsindən bir gün əvvəl Moldova valyutasının kursu 1 dollar üçün 20,4 leydən 24-ə düşüb. Bunun ardınca qiymətlər bahalaşıb, əhali isə özünü mağazalara atıb. Dünən kurs sabitləşsə də, ekspertlər milli valyutanın getdikcə daha da ucuzlaşacağını proqnozlaşdırır.

Yeni baş nazirin proqramına korrupsiya və yoxsulluğa qarşı mübarizə, Dnestryanı münaqişənin tənzimlənməsi daxildir. Avrointeqrasiya və Rumıniya, Ukrayna və ABŞ-la strateji tərəfdaşlığı inkişaf etdirmək öhdəlikləri fonunda Rusiya ilə münasibətlər yalnız “normallaşma” tələb edən əlaqələr kimi göstərilib. Bitərəflik statusunun möhkəmləndirilməsi məqsədilə NATO ilə əməkdaşlığın davam etdirilməsini nəzərdə tutan bənd də var.

Qaburiçin Azercell-də işinə gəlincə, keçmiş iş yoldaşları onu hənddindən artıq qənaətli və bir qədər qaradinməz insan kimi xatırlayırlar. -02D-