Bakı BMT Baş Assambleyasının COVID-19 ilə mübarizəyə həsr olunmuş sessiyasının keçirilməsini təklif edir

Bakı/04.05.20/Turan:  Azərbaycan koronavirus pandemiyası ilə mübarizədə beynəlxalq səyləri dəstəkləyir. Bu barədə prezident İlham Əliyev mayın 4-də Qoşulmama Hərəkatının Təmas Qrupunun videokonfrans formatında sammitində çıxışı zamanı deyib. Görüş Hərəkatın sədri kimi Azərbaycan rəhbərinin təşəbbüsü ilə keçirilir.

İ.Əliyev Hərəkatın bütün üzv dövlətlərinin COVID-19 ilə bağlı görüşün keçirilməsi təşəbbüsünü yekdilliklə dəstəklədiyini təqdirəlayiq hal adlandırıb. Azərbaycan, Hərəkatın sədri olaraq yaxın üç ildə beynəlxalq arenada üzv ölkələrin maraqlarının qorunması üçün əməli addımlar atacaq və həmrəyliyin gücləndirilməsini və qarşılıqlı dəstəyi rəhbər tutacaq.

İ.Əliyev qeyd edib ki, Bakı COVID-19 ilə mübarizə üzrə beynəlxalq səyləri dəstəkləyir və martda ÜST-ə 5 milyon dollar könüllü maliyyə yardımı ayırıb.

“Pandemiyaya qarşı mübarizədə ən çox yardıma ehtiyacı olan Qoşulmama Hərəkatı üzv dövlətlərini dəstəkləmək üçün Azərbaycan Ümumdünya Səhiyyə Təşkilatına əlavə olaraq 5 milyon dollar ianə ayırır”, - İ.Əliyev deyib. O, BMT  Baş Assambleyasının COVID-19 pandemiyasına həsr olunmuş xüsusi sessiyasının keçirilməsi təşəbbüsü ilə çıxış etməyi təklif edib. 06В-