Hakimiyyət kiçik məmur “ov”unu korrupsiyaya qarşı mübarizə kimi qələmə verməyə çalışır

Bakı/ 04.05.20/Turan: Ölkənin Baş Prokurorluğu qəfildən bölgələrdə kiçik məmurlar tərəfindən qəsbetmə hallarına ağrılı həssaslıq göstərməyə başlayıb və bu bəlaya qarşı mübarizə haqda “seriallar”ın dərcini davam etdirir. Üstəlik, bölgələrdə icra hakimiyyətlərindəki məmurların Heydər Əliyev Fondu tərəfindən ayrılan sosial yardımı mənimsədikləri xüsusi qeyd olunur.

Belə ki, Baş Prokurorluğun mətbuat xidməti bildirib ki, Sabirabad rayonunun Ulacalı və Quruzma kəndlərində icra nümayəndələri imkansız ailələrə göndərilmiş ərzaq yardımını özlərinin yaxın qohumlarına, o cümlədən kəndin imkanlı şəxslərinə paylayıblar.

Ağcabədi rayonunda Pərioğullar  və Aran kənd inzibati ərazi dairəsi üzrə,  həmçinin Tərtər rayonunda icra nümayəndələr vəzifə saxtakarlığına yol verərək arayışlara bilə-bilə yalan məlumatlar daxil edib ayrı-ayrı şəxslərin xüsusi karantin rejimi qaydalarına zidd olaraq rayon ərazisini tərk etməsinə şərait yaradıblar.

Beş məmura qarşı vəzifə saxtakarlığına görə cinayət işi açılıb və işdən azad edilib. Prokurorluq vətəndaşları qanunsuz faktlarla bağlı “961” nömrəli “Çağrı Mərkəzi”nə məlumat verməyii xahiş edir.

Qeyd edək ki, prokurorluq milyonlarla vəsaiti oğurlayan yüksək vəzifəli məmurların və hökumət üzvlərinin iştirakı ilə baş verən qalmaqallara göz yummaqda davam edir. Belə ki, keçmiş və indiki nazirlərin korrupsiyası, xaricdə çox milyonluq obyektlər almaları, firma və şirkətlərinin və digər bizneslərinin olması barədə məlumatlar nədənsə hakimiyyətin diqqətindən kənarda qalır.

Belə ki, vətəndaşların Biləsuvar rayon icra başçısı tərəfindən torpaqlarının zəbt olunması ilə bağlı uzunmüddətli şikayətlərini hakimiyyət illərdir görmürdü və eşitmirdi. Ancaq icra başçısı həbs olunan kimi “qəfildən” şikayətlər eşidildi.-02D-